Batutat mes përfaqësuesit të KFW dhe kryeministrit/ Gjermani i mahnitur nga Tirana e pastër, përgjigjia e Ramës...

Nuk kanë munguar batutat në takimin e sotëm mes përfaqësuesit të KFW dhe kryeministrit Rama, gjatë firmosjes së marrëveshjes me Gjermaninë për intekonjeksionin mes Shqipërisë dhe Maqedonisë.

Teksa mori fjalën e rastit, përfaqësuesi gjerman vlerësoi ndryshimet pozitive që konstatoi në Shqipëri, duke veçuar Tiranën e pastër që gjeti.

“Unë mund të konstatoj ndryshimet që janë bërë, kur erdha në mesnatë, ishte një habi dhe shihja me admirim njerëzit që pastrojnë rrugët dhe mendova se ne kemi gjera për të përmirësuar në Gjermani, gjeta qytet të pastër”-tha ai.

Pas tij fjalën e ka marrë kryeministri Rama, i cili duke falënderuar Gjermaninë për ndihmën e çmuar jo vetëm monetare, por në sferën e administrimit të parave, nuk e la konstatimin e përfaqësuesit gjerman pa një koment.

“Faleminderit për komplimentet për Tiranën e pastër, duhet t’ju korrigjoj se nuk ma merr mendja që jemi në fazën që ju të mësoni nga ne për pastërtinë e qytetit. Ka qenë një kohë para shumë vitesh që mendohej se ishim të dytët pas Gjermanisë, një luan i vogël ekonomik, por besoj se kemi vite dritë që na ndajnë dhe sa më shumë të përfitojmë nga drita e diturisë suaj aq më mirë është për ne”- tha Rama.

Sipas tij konkurrenca mund të vlejë vetëm në një fushë, në futboll.

“Kur vjen puna te konkurrenca ne mund t’ju mundim në futboll më shumë se kaq ne nuk besoj se do arrijmë ndonjëherë, e megjithatë edhe nëse nuk ju mundim, edhe në skuadrën tuaj kombëtare ka një kontribut direkt shqiptar. Mustafi nuk është juaji, është joni, Gjermania ka fanelë më hijerëndë, sidoqoftë në këtë bashkëpunim bilateral ai për Gjermaninë ka peshën e interkojeksionit që ne sot firmosim, madje rrezik se është më i shtrenjtë se interkonjeksioni”- tha Rama.