“35 urgjenca brenda ditës dhe 4 humbje jete”, gazetari Skëndaj tregon si paraqitet sot gjendja në spitalin ‘Shefqet Ndroqi’: Pacientët presin deri në 2 orë në ambulancë!

Gazetari Erjon Skëndaj bën të ditur se një pacient rreth të 60-tave në gjendje të rënduar shëndetësore si pasojë e Covid-19 ka pritur brenda autoambulancës për rreth 2 orë, derisa në urgjencën e “Shefqet Ndroqit” u lirua një vend.

News24 ka fiksuar autoambulancën e Elbasanit tip Benz mercedes, me targë AA284BE, që nga momenti i mbërritjes në orën 11:20 dhe deri në momentin e dorëzimit të pacientit rreth orës 13:25.

Gjatë më shumë se 120 minuta pritje në autoambulancë pacienti nga Elbasani është mbajtur nën monitorim të mjekëve që kanë shfaqur shqetësim, duke e vizituar vazhdimisht brenda autoambulancës.

Sipas Skëndajt, brenda spitalit pohuan në urgjencë nuk ka vende të lira dhe aq më pak në spital, ku shtrimet janë në kapacitetin maksimal me 220 të shtruar.

Në 24 orët e fundit në urgjencën e këtij spitali kanë mbërritur 35 urgjenca, kryesisht nga Tirana, ndërsa kanë ndërruar jetë 4 persona.