4 ministri firmosin pakt kombëtar kundër dhunës ndaj fëmijëve, synohet forcimi i mekanizmave të sinjalizimit të hershëm

Në Ditën Ndërkombëtare për të Drejtat e Fëmijëve, dje u firmos Pakti Kombëtar kundër dhunës seksuale dhe çdo forme dhune ndaj fëmijëve. Pakti u firmos nga ministri i Brendshëm, ministrja e Arsimit dhe Sportit, ministrja e Shëndetësisë dhe Mbrojtjes Sociale, ministrja e Shtetit për Rininë dhe Fëmijët, si dhe përfaqësuesit e shoqërisë civile, si një angazhim për të bashkërenduar veprimet në mbrojtje të të drejtave të fëmijëve në Shqipëri.“Ky pakt është i një rëndësie të veçantë, pasi bëhet fjalë për sigurinë dhe mbrojtjen e fëmijëve, që janë të parët në politikat tona. Ne jemi të angazhuar të forcojmë mekanizmat e parandalimit dhe sinjalizimit të hershëm, si forma më e mirë për reduktimin, deri në eliminim të çdo forme të dhunës ndaj fëmijëve”, tha ministrja e Arsimit dhe Sportit, Ogerta Manastirliu. Duke folur për reformën e re të sapo shpallur nga Ministria e Arsimit dhe Sportit në arsimin parashkollor, Manastirliu u shpreh se ajo do të prekë të gjitha aspektet që lidhen me sigurinë, mbrojtjen dhe edukimin në fëmijërinë e hershme.  “Do të rishikohet jo vetëm paketa e akteve ligjore e nënligjore, jo vetëm zgjerimi dhe forcimi i mekanizmave të inspektimit periodik, duke përdorur edhe teknologjinë, por do të bëhet edhe vlerësimi periodik psiko-social jo vetëm për mësuesit, por edhe për edukatoret e çerdheve dhe kopshteve”, theksoi ajo. Ministrja Manastirliu e vuri theksin gjithashtu tek rëndësia e bashkëpunimit për rritjen e sigurisë kibernetike, si dhe tek mbështetja për punonjësit psiko-socialë dhe punonjësit e sigurisë në shkolla, e cila do të vijojë edhe me buxhetin 2024, për të garantuar më shumë siguri dhe mbrojtje të fëmijëve në sistemin arsimor. Pakti i firmosur  parashikon forcimin e bashkëpunimit, shkëmbimit të informacionit dhe koordinimit, për të luftuar dhe mbrojtur fëmijët nga çdo formë e dhunës dhe e shfrytëzimit seksual, bullizmit, manipulimit dhe nxitjes për përdorimin e substancave, si dhe gjuhës së urrejtjes në internet dhe në jetën reale.