Abuzuan me tenderin, Gjykata e Tiranës merr vendimin për punonjësit e Universitetit Bujqësor të Tiranës

Gjykata e Tiranës ka lënë në masën e sigurisë 'arrest me burg' katër punonjësit e Universitetit Bujqësor të Tiranës. Ali Rasha, Drejtor i Fermës Didaktike Eksperimentale, Tahir Ballgjini, Përgjegjës i Sektorit të Bujqësisë, Rushit Suna, specialist i sektorit të bujqësisë dhe Ahmet Mejdani, magazinier në magazinën qendrore të UBT, mbetën në burg.

Të katërt, në bashkëpunim me njëri-tjetrin, në role të ndryshme, paracaktonin fituesin e tenderave dhe kryenin hyrje-dalje fiktive të mallrave në magazina. Policia sekuestroi në cilësinë e provës materiale një automjet të drejtorit të fermës që përdoret nga studentët e Bujqësorit, dhe 5 aparate celulare.

Gjithçka nisi pas kallëzimit të magazinierit prej 10 vitesh në këtë fermë. Ahmet Mejdani ka kuptuar se procesverbalet për plehra kimikë dhe impute bujqësore fituar me tender nga kompania “Gjelbërimi” nuk korrespondonin me çka kishte në magazinë.