Apeli i GJKKO rrëzon kërkesën e Thoma Gëllçit për t’u shpallur i pafajshëm, ish-drejtori i RTSH u dënua me 2 vite burg nën akuzën e shpërdorimit të detyrës

Apeli i GJKKO ka lënë në fuqi vendimin e marrë në datën 2 qershor të këtij viti ku ish drejtori i RTSH, Thoma i Gëllçit Gëllçi u dënua me 2 vite burg nën akuzën e shpërdorimit të detyrës së tij. Si pasojë e aplikimit të gjykimit të shkurtuar, dënimi reduktohet në 1 vit dhe 4 muaj heqje lirie. Vendimi i lënë në fuqi nga GJKKO lë në burg edhe anëtarët e Komisionit të Vlerësimit të Ofertave, Julian Tapia, Ervin Muraj dhe Alban Malaveci të cilët u dënuan me nga 1 vit burg secili. Vuajtja e dënimit ndaj të pandehurve nis që nga data e arrestimit të tyre, pra nga 8 tetori i vitit 2021. Pavarësisht se tashmë e kanë përfunduar dënimin me burg, Thoma Gëllçit dhe ish zyrtarëve të tjerë të RTSH, u ndalohet ushtrimi i funksioneve publike për një afat kohor 5 (pesë) vjeçar. Gëllçi dhe anëtarët e komisionit të Vlerësimit, akuzohen për shkelje të barazisë në tendera dhe ankande publike. Bëhet fjalë për tenderin për blerjen e pajisjeve për kanalin RTSH Agro me vlerë 86. 908 550, 00 lekë (pa tvsh), afro 1 mln dollarë me TVSH. Kanë qenë denoncimet e bëra nga kompanitë e skualifikuara në tender, ato që kanë mundësuar arrestimin e tre zyrtarëve të komisionit dhe të ish drejtorit i cili akuzohet për shpërdorim detyre pasi ka kryer shkelje ligjore në këtë procedurë prokurimi. Kujtojmë se, nga hetimet e kryera rezultoi se në tender janë konstatuar shkelje ligjore nga 3 anëtarë të Komisionit të Vlerësimit të Ofertave, të cilët gjithashtu kanë rënë në pranga. Të tre vartësit e Gëllçit, A.M, E.M, J.T, akuzohen për veprën penale “Shkelja e barazisë në tendera apo ankande publike”, kryer në bashkëpunim. Nga hetimet ka rezultuar se krahas tyre edhe Gëllçi në postin e Drejtorit të Përgjithshëm të RTSH, ka shpërdoruar detyrën në këtë proçedurë prokurimi. Gëllçi e mori detyrën si drejtor i përgjithshëm i RTSH në 6 Maj 2016 kurse më 21 maj të këtij viti u lirua nga ky post. Vendimi u bë i ditur nga vetë RTSH, e cila në një kronikë të përgatitur atëherë deklaroi se atij i kishte mbaruar mandati i qëndrimit në detyrë.