Bajram Çekorja shpallet në kërkim për vrasjen e Erjon Xhenjes në Shkodër, u hakmor për babain e vrarë, 19-vjeçari punonte te Asmer Bilali

Bajram Çekorja, 24-vjeçari i cili kërkohet për t’u arrestuar nga policia për atentatin e dështuar ndaj Alban Bruçit në 25 gusht në Shkodër, është shpallur në kërkim dhe për vrasjen e 19-vjeçarit Erjon Xhenje mbrëmjen e 18 shtatorit në një bar-kafe në bulevardin “Bujar Bishanaku”. Policia e Shkodrës njoftoi nëpërmjet një komunikate për shtyp se në bazë të verifikimeve dhe hetimeve të kryesore, shpalli 24-vjeçarin Çekorja si autorin kryesor të ekzekutimit me 7 plumba të Erjon Xhenjes. Sipas hipotezës kryesore, Erjon Xhenje u vra në shenjë hakmarrjeje nga Bajram Çekorja, pasi është kushëri i Shkëlzen Xhenjes, i dyshuar për ekzekutimin e Ismet Çekorjes, babait të Bajramit, i vrarë pranë banesës së tij në 2 shtator. Lidhur me ekzekutimin e 57-vjeçarit Çekorja, policia aludon se Erjon Xhenje mund të ketë nxjerrë në pritë të atin e Bajram Çekorjes për t’u vrarë për llogari të Asmer Bilalit. Ngjarja në fjalë përfaqëson serinë e radhës të luftës mes bandave kriminale dhe familjeve të Shkodrës. Babai i Erjonit i kërkoi 2 orë para krimit të largoheshin në Malin e Zi I ati i Erjon Xhenjes reagoi një ditë pas vrasjes së të birit se ngjarja nuk ka lidhje personalisht me djalin e tij, por me kushërinjtë e Erjonit, pra nipat e tij. Ai tregoi se kishte tentuar ta largonte të birin për t’i shpëtuar hakmarrjes. “kam prej 1 jave që kërkoj shtëpi me qira, t’i largoj nga këtu. Nuk është problemi ynë por i nipave. Unë s’kam punë, skam lidhje me asgjë, nuk di asgjë”, tha babai i Erjonit. Sipas policisë, ai e telefonoi të birin 2 orë para krimit që të kthehej në banesë për t’u larguar së bashku më pas drejt Malit të Zi, por fatkeqësisht, Erjon Xhenje refuzoi dhe u vra me 7 plumba në orën 20:10. Viktima punonte te Asmer Bilali, kushëri me dy vëllezërit problematikë Xhenje Viktima i atentatit të 18 shtatorit ka punuar në fermën e kuajve të Asmer Bilalit, i akuzuar dhe i mbajtur për disa kohë në burg si anëtar i grupit kriminal Bajri në Shkodër. Nga ana tjetër, lidhja farefisnore më vëllezërit Shkëlzen dhe Sehar Xhenja, mund të jetë shkaku kryesor i vrasjes së 19-vjeçarit. Shkëlzeni dhe Sehari janë shpallur në kërkim nga policia që prej 20 shkurtit 2021 pasi kanë tentuar me mikun e tyre Eljon (Esmeraldo) Hato të vrasin 30-vjeçarin Taulant Pepaj në lagjen “Skanderbeg”. Shkëlzen Xhenje në 22 shkurt 2021 deklaroi në një intervistë për emisionin “Uniko” në “TV Klan” se nuk ka lidhje fare me ngjarjen pasi u largua nga Shqipëria që prej 12 janarit 2021. Dy vëllezërit Xhenje janë përfshirë dhe në ngjarje të tjera të rënda në të kaluarën. Shkëlzen Xhenje dyshohet si njëri prej autorëve të vendosjes së një sasie tritoli ndaj 34-vjeçarit Bledar Çekorja, në 28 janar 2014 në Shkodër, ndërsa pasi bëri 4 vite e 8 muaj burg u lirua duke përfituar nga një amnisti në atë kohë. Një muaj pas lirimit, më 18 shkurt të 2017-ës Shkëlzen Xhenje u arrestua për plagosjen e Flutura Muçës. Kjo e fundit e akuzoi se atentati ishte porositur nga Sadetin Sula, i dënuar me burg përjetë për vrasjen e ish-bashkëshortes së tij Suela Sula, motra e të plagosurës Flutura Muça. Xhenje mohoi se ka lidhje me këtë ngjarje. Më 22 shkurt 2018 u sulmua me thikë ish-trajneri i Vllaznisë, Ernest Gjoka. Autor i ngjarjes të këtij sulmi u dyshua Nehat Fojleta dhe Sehar Xhenje mendohet se është personi që drejtoi mjetin me të cilin u larguan pas ngjarjes.