Barometri i Sigurisë 2022, analisti jep alarmin: Ja kush është kërcënimi më i lartë për Shqipërinë

Eduard Zaloshnja ka folur mbrëmjen e sotme në një emision televiziv në lidhje me Barometrin e Sigurisë për vitin 2022.

Ai shpjegoi se sipas këtij Barometri, ka rezultuar se korrupsioni shihet si kërcënimi më i rëndë për vendin dhe se shumica e qytetarëve mendojnë se korrupsioni gjatë 5 viteve të fundit është rritur.

Po ashtu një pjesë e konsiderueshme pohojnë se korrupsioni është shtrirë shumë thellë dhe se vështirë se mund të ndryshohet.

Zalonshnja tha se synimi këtij ‘Barometri’ është që të krijohet një pasqyrë e opinionit që kanë shqiptarët e thjeshtë me çështjet e sigurisë.

“Unë kam bërë skemën e kampionimit, shpërndarjen e anketave në pika të ndryshme në të gjithë vendin. Dyrmishi është autori i interpretimit të këtyre rezultateve. Ky është një barometër që bëhet çdo vit, synimi është që të krijohet një pasqyrë e opinionit që kanë shqiptarët e thjeshtë në lidhje me çështjet e sigurisë. Pyetjet janë përmbajtësore që kanë të bëjnë me sigurinë personale, në ambientin ku jetojnë, në botë apo në rajon. Anketimi bëhet drejtpërdrejt në terren.”, tha Zaloshnja.

Ai gjithashtu theksoi se kryefjala e studimit është korrupsioni, sepse ka katër vite rresht që perceptohet si rreziku më i lartë në vend.

“Qytetarëve iu është dhënë një listë me 10 kërcënime të mundshme. 67 % kanë zgjedhur korrupsionin si kërcënimin më të madh. Këtë vit është shfaqur kërcënimi i luftës me vendet fqinje dhe kjo ka të bëjë me fillimin e luftës në Ukrainë dhe rritjen e tensioneve në Ballkan. Pra ka shkuar në 49 %. Lufta me vendet fqinjë konsiderohet edhe më i rrezikshëm. Gjëja më e rëndësishme  është se 2/3 e shqiptarëve e shohin korrupsionin si një nga dy kërcënimet më të mëdha të vendit. Pra pothuajse 85 % mendojnë që ose ka mbetur njësoj se është rritur edhe më tepër. Ky tregues përputhet me atë që kemi bërë ndër vite, që gjithmonë korrupsioni është tregues i nivelit të lartë të rrezikut”, tha ai.