“Bordet i cakton qeveria”/ Gazetari ngre alarmin, tregon çfarë po planifikohet të bëhet me spitalet në vendin tonë: Ligji i ri ka dritëhije!

Në komisionet parlamentare po diskutohet ligji për shërbimin spitalor, që sipas qeverisë do të sigurojë autonominë spitalore.

 Gazetari Erion Skëndaj thotë se ligji i ri, nëse miratohet siç është, do ta përkeqësojë situatën në spitale.

“Spitalet nuk është çudi që të vënë tarifë. Ky ligj shumë shpejt nëse miratohet sic është, do ta përkeqësojë situatën në spitale.”, tha ai.

Lidhur me ligjin ekzistues, Skëndaj u shpreh se ai nuk u zbatua kurrë plotësisht. Sipas tij, ligji i ri nuk garanton autonomi për shkak të zgjedhjes nga qeveria.

“Ishte projektuar të kishim këshill administrimi në nivel qarqesh që nuk u ndërtua kurrë. Në ligjin  e vjetër kemi një ligj të dështuar që nuk u aplikua kurrë. Qeveria merr ligjin dhe e hedh në kosh të plehrave pa parë sa mund të realizohej autonomia spitalore. Ligji thotë që spitalet do të menaxhojnë paratë e tyre. Do të ketë autonomi menaxheriale dhe autonomi financimi.

Ky ligj ka dritëhije. E dimë se si në vite të shkuara hapësira e spitaleve i është dhënë më qira spitaleve. Janë kthyer në kancer të spitaleve. Nuk shoh një mënyrë shumë racionale të kësaj autonomie.

Bordet do të nxjerrin drejtorin ekzekutiv. Për bordet vetë nuk thuhet as gjë. Me gjasa ato do të caktohen nga qeveria, pra ku është autonomia spitalore. Në ligjin e vjetër kishte më shumë frymëmarrje. Sot do të kemi borde spitalore të zgjedhura nga qeveria që më pas do të lidhin kontrata me privatin.

Në momentin që spitali bëhet me vetëfinancim, ku do i gjejë të ardhurat. Në ligj thuhet se spitalet do të kenë buxhetim nga shteti, nga kontrata me palë të treta, nga kontrata me sigurimet private. Por kjo nuk e zgjidh problemin. Marrim mjekët që punojnë edhe në shtet edhe në privat por në ambiente shtetërore. Ligji do të kërkojë kohë të bëhet i zbatueshëm por do të krijohet mundësi të ketë akses për individët jashtë sistemit të referimit. 70 e ligjit do të mbushet me akte nënligjore, aktualisht kemi vetëm konturet e ligjit.”, tha Skëndaj.