Detaje nga operacioni antidrogë ku u arrestua ish zyrtari i lartë i PS-së, djali dhe e fejuara e tij/ SPAK del në konferencë urgjente: Detajet e operacionit, kokaina kap vlerën 40 milionë euro

Tre persona janë arrestuar dhe një shtetas kolumbian është shpallur në kërkim në kuadër të operacionit anti-drogë, ku u gjet laborator kokainë në zonën e Fratarit në Fier.

Në pranga kanë rënë Viktor Çervenaku, ish-kryekomunari i PS-së , Demilson Çervenaku i biri dhe Enxhi Ferhati e fejuara e këtij të fundit. Në kërkim është shpallur shtetasi nga Kolumbia, Zaimir Rodriguez.

SPAK ka dalë në një konferencë për mediat në lidhje me operacionin që zbuloi një laborator droge ne Fier.

Prokuroria e Posaçme Kundër Krimit dhe Korrupsionit ka dhënë detaje në lidhje me operacionin antidrogë ku u zbulua laboratori i kokainës në Fier. Në një  deklaratë për mediat SPAK bën të ditur se janë sekuestruar 430 kg lëndë narkotike kokainë me vlerë 40 milionë euro.

“Ekzistonin të dhëna që në maj 2022 ishte ngarkuar një sasi me pleh artificial për në Pire, transit në Bari me porositës një shtetas shqiptar. Me kërkesë të autoriteteve malazeze është bërë kontrolli. Rezultoi që porositësi i mallit ishte shtetasi shqiptar që kishte hapur aktivitet ndër të cilat ishte edhe importi i plehrave kimike dhe mallrave të tjera. Pasi sasia me pleh është dërguar në Shqipëri kanë vijuar veprimet e tjera deri dje që është bërë kontrolli dhe sekuestrimi i kësaj sasie në Farkë të Madhe të Fierit”, tha prokurori i çështjes.