Fillon reprezalja ndaj komisionerëve që vodhën zgjedhjet e 25 prillit, arrestohen 6 persona që ndryshuan rezultatin në Elbasan

Policia e Elbasanit ka ekzekutuar urdhrin e Prokurorisë së qytetit për të arrestuar 8 numërues të votave të subjekteve politike Partia Socialiste, Partia Demokratike dhe Lëvizja Socialiste për Integrim në Elbasan gjatë zgjedhjeve parlamentare të 25 prillit 2021. 8 personat akuzohen se kanë falsifikuar rezultatin zgjedhor në 2 qendra votimi; QV nr.2780 dhe nr. 2796 në KZAZ nr. 53 të qytetit të Elbasanit. Për rrjedhojë, janë prangosur Erald Karriqi (PD), Erjon Dashi (PD), Ylli Kukaj (PS), Algert Alla (PS), Durim Alla (PS) dhe Mili Vasku (LSI), kurse janë shpallur në kërkim Eduard Zito (LSI) dhe Oltjon Bajrami (PS). Prokuroria e Elbasanit ka vepruar pas konstatimit të parregullsive në kutitë e votave në dy qendrat e votimit. Ndaj 8 numëruesve të votave është ngritur akuza për veprën penale “Falsifikim i materialit zgjedhor dhe rezultatit të zgjedhjeve”, të parashikuara nga neni 326/2  e 25 të Kodit  Penal. Sipas njoftimit të Prokurorisë së Elbasanit, grupet e numërimit në QV nr. 2780 të KZAZ nr. 53 përbëhej nga Erald Karriqi,Ylli Kukaj,Oltjon Barjami dhe Eduart Zito, kurse Grupi i Numërimit në QV nr. 2796 të KZAZ nr. 53 përbëhej nga Durim Alla, Erjon Dashi, Mili Vasku dhë Olgert Alla.
Numëruesit justifikohen me pakujdesinë e lodhjen, ja dëshmia e Durim Allës
Të gjithë ish-numëruesit e votave në këto dy qendra votimi kanë pranuar se ka patur mospërputhje të numrit të votave të kandidatëve me numrin e votave në kuti. P.sh., ish-numëruesi i PS në QV nr. 2796, Durim Alla ka thënë në deklaratën e tij lidhur me numërimin e votave për kandidatët për deputetë në Elbasan, pranoi se ka patur mospërputhje me numrin e votave në kuti teksa kandidati i PD, Lefter Gështenja dilte me 38 vota më shumë, ndërsa socialisti Ardian Zeneli me 38 më pak. Sipas tij, ky është gabim njerëzor i shkaktuar nga lodhja e gjatë dhe nuk ka pasur dashakeqësi. “Në lidhje me  Tabelën e Rezultatit  për Kandidatët për Deputet në qendrën e votimit  nr. 2796, për  Partia/Koalicioni Partia Demokratike ‘Aleanca Për Ndryshim’ ku ka ndryshime  votash plus 38 vota për  kandidatin Lefter Gështenja   dhe minus 38 vota për kandidatin Ardian Zeneli nga krahasimi me votat në kuti, unë  them se është një gabim njerëzor, nuk është e qëllimshëm. Ky veprim është bërë nga pakujdesia , si rezultat i lodhjes  dhe pa asnje lloj interesi”, thuhet në deklaratën e Allës.
1-5 vite burg, Prokuroria e Elbasanit nuk merr parasysh justifikimet e numëruesve
Prokuroria e Elbasanit nuk i merr aspak parasysh se rezultati i votimeve në këto qendra është ndryshuar jo për shkak të pakujdesisë e lodhjes, pasi numëruesit e votave e kanë pranuar me vullnetin e tyre administrimin e zgjedhjeve në këto dy qendra votimi. Sipas Kodit Penal, ata rrezikojnë të dënohen nga 1-5 vite burg.  Organi procedues vlerëson se edhe vetë autorët e kësaj vepre  penale paraqesin rrezikshmëri të theksuar shoqërore, sepse ata në lidhje me faktin penal që ju është atribuuar kanë mbajtur qëndrim mohues duke paraqitur alibinë se veprimi është kryer me pakujdesi apo dhe në kushtet e lodhjes ndërkohe që kanë qenë vetë ata që kanë pranuar detyrën administratorit të zgjedhjeve në rolin e numëruesit të votave”, shkruhet në njoftimin e Prokurorisë së Elbasanit për arrestimet e djeshme.