Lejoi kryerjen e botoksit në stomak në shkelje me ligjin dhe Ministrinë e Shëndetësisë, Prokuroria e Fierit mbyll hetimet dhe dërgon për gjykim drejtoreshën e Spitali Memorial

Prokuroria e Fierit mbylli hetimet dhe kërkon nga Gjykata e Fierit që Drejtoresha e Spitalit të Përgjithshëm Memorial, Rudina Degjoni të merret e pandehur për kryerjen e veprës penale “Shpërdorimi i detyrës”. Në njoftimin e dhënë për mediat nga ky organ akuze, Degjoni akuzohet se ka lejuar kryerjen e procedurave të përdorimit të botoksit në stomakun e pacientëve në kundërshtim me aktet ligjore e nënligjore, pa patur as miratim nga Ministria e Shëndetësisë dhe Mbrojtjes Sociale. Përveç lejimit të përdorimit të botoksit në stomak, zyrtarja e lartë e shëndetësisë akuzohet gjithashtu se ka kryer shkelje dhe për blerjen e preparateve mjekësore të botoksit, pa pasur prokurim publik. Prokuroria e Fierit arriti në konkluzion e saj se Drejtoresha Degjoni ka rrezikuar me këto vendime shëndetin e pacientëve dhe ka dëmtuar imazhin e institucionit që kryeson. Ajo bëhet zyrtarja e tretë e MSHMS që përballet me drejtësinë. Javën e kaluar, Gjykata e Posaçme kundër Korrupsionit dhe Krimit të Organizuar vendosi të marrë të pandehur ish-Sekretaren e Përgjithshme të MSHMS, Joana Duro dhe ish-specialisten Laura Shteto për ryshfet 300 mijë lekë, me qëllim dhënien e një loti tenderi prej 800 mijë lekësh për rikonstruksionin e qendrave shëndetësore në Tiranë dhe Durrës, në favor të biznesmenit Vladimir Topi.

Njoftimi i Prokurorisë së Fierit për Rudina Degjonin

“Prokuroria Pranë Gjykatës së Shkallës së Parë të Juridiksionit të Përgjithshëm Fier ka  përfunduar hetimet dhe ka dërguar për gjykim procedimin penal në ngarkim të shtetases Rudina Degjoni, me detyrë Drejtor i Përgjithshëm pranë Spitalit Memorial Fier, e akuzuar për veprën penale të “Shpërdorimit të detyrës”, të parashikuar nga neni 248 i K.Penal. Nga hetimet është provuar se e pandehura në kundërshtim me aktet ligjore dhe nënligjore në fuqi dhe në mungesë të miratimit nga Ministria e Shëndetësisë, ka lejuar kryerjen e paligjshme të procedurës së botoksit të stomakut te pacientët në këtë spital publik, nëpërmjet aplikimit në organizimin e brendshëm të pacientëve, të preparateve mjekësore të botoksit të stomakut që nuk janë blerë nga vetë spitali me procedura të ligjshme të prokurimit publik, por janë gjetur në rrugë jashtë-spitalore për të cilat pacientët kanë bërë pagesat e tyre. Mungesa e kryerjes së procedurave të ligjshme të prokurimit publik, ka sjellë mungesën e verifikimit në këtë spital të dokumentacionit përkatës lidhur me verifikimin e datës së skadencës dhe vendit të origjinës së preparateve, duke sjellë kryerjen e kësaj procedure jashtë çdo lloj standardi ligjor dhe teknik te pacientët, duke mbartur rrezik serioz për jetën dhe shëndetin e tyre, si dhe duke dëmtuar interesat dhe imazhin e një një institucioni shëndetësor publik”, bëri me dije Prokuroria e Fierit.

E kaluara e Rudina Degjonit  

Në shtator 2020, Rudina Degjoni u largua nga drejtimi i Fondit të Sigurimit të Detyrueshëm të Kujdesit Shëndetësor (FSDKSH) pas 1 viti e gjysmë. Ajo u zëvendësua nga Elisa Berziu, që në atë kohë mbante funksionin e Koordinatores së Platformës së Bashkëqeverisjes në Kryeministri. Degjoni u përfol se u shkarkua për shkak se Kontrolli i Lartë i Shtetit kishte konstatuar shkelje të rënda në FSDKSH, por lajmi u raportua se ajo dha dorëheqjen, pra nuk u shkarkua.

“Tempulli”, kapet dhe një 19-vjeçar në Tiranë, deri tani 91 të arrestuar

Megaoperacioni “Tempulli” ka vazhduar dhe dje kundër goditjes së grupeve kriminale të trafikut dhe shpërndarjes së lëndëve narkotike. Një 19-vjeçar, i shpallur në kërkim nga Gjykata e Tiranës për veprën penale “Prodhimi dhe shitja e narkotikëve” u prangos nga Shërbimet e Seksionit për Hetimin e Narkotikëve dhe Komisariati Policor i Rinasit. I ndaluari është shtetasi me inicialet L.N. Sipas Policisë së Shtetit, numri i të arrestuarve nga ky megaoperacion ka shkuar në 91 persona. Nga ana tjetër, Gjykata e Elbasanit la në burg 9 të arrestuarit e megaoperacionit “Tempulli” në këtë qytet.

Gati për krim, në pranga 6 anëtarë të një grupi të rrezikshëm kriminal
Mbrëmjen e së dielës, RENEA, FNSH dhe Policia e Vlorës realizuan operacionin “Obelisku” duke arrestuar 6 persona, të konsideruar pjesëtarë të një grupi kriminal mjaft të rrezikshëm që operon në këtë qytet. Ata u kapën në një lokal në lagjen “Lef Sallata”. Në bazë të njoftimit nga Policia e Shtetit, shtetasit me iniciale S.B., 37 vjeç; M.A., 33 vjeç; B.SH., 29 vjeç, M.H., 27 vjeç, B.XH., 29 vjeç dhe K.M. 28 vjeç dyshohen se po përgatiteshin për të kryer një ngjarje kriminale. Dy prej të arrestuarve S.B., 37 vjeç dhe M.A., 33 vjeç iu gjetën pistoletë pa leje “Glock” dhe “TT”. Ata akuzohen për armëmbajtje pa leje, ndërsa 4 të tjerët për moskallëzim krimi. Përveç armëve, forcat e rendit sekuestruan dhe 3 makina, 2600 euro dhe 8 celularë.