Lidhja e Lulzim Bashës me Toyota Yaris, Artan Hoxha jep detaje: Kemi një proces të hapur, ja sa do të zgjasë çështja

Gazetari investigativ, Artan Hoxha, ka komentuar dosjen e famshme të 3.4 milion eurove të kapuara në makinën tip ‘Toyota Yaris’ në Portin e Durrësit.

Hoxha tha se Lulzim Basha duhet të dalë dhe të thotë nëse është marrë në pyetje apo jo nga prokurorët belg, pasi i vetmi hetim që po zhvillohet për momentin është vetëm ai në Belgjikë.

“Prokurori belg që merret me çështjen, e ka thirrur shtetasin gjerman, dhe e ka marrë në pyetje, duke bërë që ky i fundit të tërhiqet dhe tha: “Jo, s’janë të miat, por mua më thanë që do marrësh kaq për qind po e more përsipër ti.” Ajo që është sot fakt është se në Shqipëri çështja është e mbyllur, në Belgjikë kemi një proces të hapur, që mund të zgjasë deri në 5 vjet. Lulzim Basha duhet të thotë nëse ka dhënë deklarime apo jo përballë prokurorëve belg, të cilët kanë ardhur në Shqipëri disa herë. Ato para janë të sekuestruara në Shqipëri, madje Belgjika nuk ka mundur ende ta verifikojë nëse ato para janë të prodhuara në Belgjikë, pra nëse janë para të shtetit belg”, tha Hoxha.