Lufta kundër trafiqeve të lëndëva të forta narkotike, agjentët e DEA-s zbarkojnë në Shqipëri, operacion në disa qytete, priten arrestime

Dy agjentë të DEA-s amerikane kanë mbërritur në Shqipëri për të ndërmarrë një megaoperacion pas sasisë prej 1.3 ton kokainë të kapur në portin e Savonës, në Itali si dhe arrestimit të 4 shqiptarëve. Operacioni do të shtrihet në disa qytete të vendit, pasi në përgjimet e autoriteteve të huaja kanë dalë emra të personave të përfshirë në trafikun e drogës, ku pritet të ketë arrestime “VIP”. Sasia e kokainës në Itali u zbulua më 2 janar. Ngarkesa ishte nisur nga Brazili dhe dyshohet se organizatorë ishin shtetas shqiptarë. Më konkretisht u sekuestruan 741 pako kokainë, të ambalazhuara në 26 mbështjellës celofani, të fshehura në motorët e varkës, me një peshë totale rreth një ton. Operacioni që është kryer nga Guardia di Fiananza e Barit është vazhdim i atij të 2 janarit kur u arrestuan 4 shqiptarët, të cilëve iu gjet 353 kilogramë kokainë, e fshehur në dhomat e hotelit. Pas arrestimit të të katërve, Guardia di Finanza kishte mësuar për mbërritjen në port të një ngarkese tjetër me lëndë narkotike në një anije tregtare me flamur të Hong Kongut, e cila u nis nga porti i Santos në Brazil më 30 dhjetor. Kjo është arsyeja pse u aktivizua monitorimi i ngarkesës, me mjete ajrore dhe detare, pasi ajo kishte kaluar Gjibaltarin.

Hetimet për bandën italo-shqiptare

Njësia e Policisë Ekonomiko-Financiare në Itali ka sekuestruar 5 ditë më parë sasinë e madhe të drogës të transportuar nga një anije tregtare e zbarkuar në portin e Savonës. Hetimet e deritanishme kanë shërbyer për të rindërtuar aktivitetet kriminale të një organizate kriminale e trafikut ndërkombëtar të drogës, e cila dyshohet se operon në Italinë qendrore e jugore në bashkëpunim me subjektet kriminale shqiptare. E gjithë sasi e drogës e sekuestruar për 16 ditë, pra 1.3 tonë kokainë, ishte e gjitha e destinuar për organizatën kriminale italo-shqiptare.

Agjentët e DEA-s takim “sekret” me SPAK

Kujtojmë se edhe më herët një grup agjentësh dhe oficerësh të anti-drogës amerikane DEA, mbërritën në Shqipëri. Katër oficerë të strukturës së DEA-s me seli në Athinë kanë zhvilluar një takim me një grup prokurorësh të SPAK, edhe pse kjo vizitë e agjentëve është mbajtur sekret hetimor për hetuesit shqiptarë. Takimi mes agjentëve amerikanë dhe Prokurorëve të Prokurorisë së Posaçme është zhvilluar në godinën e SPAK-ut dhe ka zgjatur për disa orë. Pjesë e diskutimeve mes tyre kanë qenë ngarkesat me drogë që kanë zbarkuar në Portin e Durrësit, të cilat kanë shënuar dhe sasitë rekord të trafikimit të kokainës së ardhur nga Kolumbia. Agjentët federalë kanë ardhur nga Greqia, ku ndodhet dhe qendra e Anti-Drogës amerikane për Ballkanin. Mësohet se ata kanë marrë informacione për operacionet e fundit të Policisë së Shtetit, por edhe doganave si dhe për format dhe procedurat e ndjekura në secilin nga rastet. Ky interes i amerikanëve pritet të pasohet edhe nga një vizitë e një grupi prokurorësh shqiptarë në vendet e origjinës të kokainës që mbërrin në Shqipëri, ku edhe disa shqiptarë kanë mbetur viktimë.