“Mos më merr nga mami”/ Del videoja ku punonjësja norvegjeze merr me forcë dy vajzat shqiptare nga nëna. Zbardhet deklarata e babait të tyre

Është publikuar momenti ku punonjësja e shtetit norvegjez largon me forcë dy vajzat e vogla të çiftit Alitcia Forsberg dhe Armend Caushi. Çifti shqiptaro-norvegjez denoncuan pak ditë më parë se shteti iu kishte marrë katër fëmijët e tyre dhe se nuk dinin ku ndodheshin, por vetëm komunikonin me ta nëpërmjet internetit.

Gazetarja e emisionit, Bora Shahini ka siguruar videon e momentit kur dy vajzat e vogla merren nga nëna me forcë ndërsa shihen duke qarë. “Jo, jo nuk dua të vij, dua të shkoj te mami”, dëgjohet duke thënë vajza e madhe. Në një tjetër video, shihet vajza e madhe Alice teksa shprehet se dëshiron të kthehet në shtëpi. Ndërkaq, në videon tjetër shihet djali Elioni ku shihet teksa tregon fotot e familjarëve të tij në vendin ku ndodhet.

Gjatë intervistës që dhanë për emisionin pak ditë më parë, babai i fëmijëve tregoi se: “Të katër fëmijët e mëdhenj janë me nënshtetësi suedeze dhe kosovare. Kam menduar me marr një avokat me ndërmjetësuar me shtetin norvegjez. Suedia na ka thënë që nëse fëmija ka lind në Norvegji dhe vetëm në letër e ka Suedi, i takon Norvegjisë vendimi”.