Moti i ftohtë, Kushi: Kemi kërkuar pajisjen me ngrohje të 28 shkollave, në disa zona orët e mësimit janë reduktuar

Ministrja e Arsimit Evis Kushi ka reaguar dje në lidhje me situatën në shkolla pas rënies së temperaturave në vlera minimale përgjatë ditëve të fundit. Përmes një statusi në rrjetet sociale, Kushi shprehet se është kërkuar në mënyrë urgjente pajisja me sistem ngrohje e 28 shkollave nga ana e bashkive respektive. “Duke konsideruar prioritet absolut shëndetin dhe mirëqenien e nxënësve tanë, gjatë gjithë vitit, e veçanërisht gjatë kësaj periudhe me temperatura tepër të ulëta dhe me ngrica në disa zona malore të vendit, po e ndjekim me shumë kujdes situatën e shkollave në të gjithë territorin e vendit, përmes strukturave tona arsimore. Në komunikim të vazhdueshëm me çdo bashki dhe njësi administrative në vend, kemi kërkuar marrjen e masave në kohë, sigurimin e ngrohjes dhe garantimin e kushteve për zhvillimin e procesit normal mësimor, si pjesë e përgjegjësisë së tyre. Përsa i takon situatës në terren dhe raportimeve në mënyrë të vazhdueshme nga zyrat arsimore, kemi kërkuar në mënyrë urgjente pajisjen me sistem ngrohjeje të 28 shkollave nga ana e bashkive respektive. Ngrohja e institucioneve arsimore bëhet në disa mënyra: ngrohje qendrore me kaldajë, kondicionerë, ngrohës me energji elektrike, si dhe sobë me dru ose peleta. Duke vlerësuar këtë përpjekje të përbashkët me institucionet e pushtetit vendor dhe institucione të tjera, u kemi kërkuar bashkive të marrin masa për 51 shkolla ku ngrohja bëhet përmes sistemit elektrik por ngarkesa në rrjet ka sjellë vështirësi për ngrohjen optimale të tyre”, shkruan ajo. Nga ana tjetër, ministrja Kushi shprehet se në disa shkolla në Dibër dhe Devoll, ku temperaturat janë tepër të ulëta orët e mësimit janë reduktuar me 10 minuta. “Gjithashtu, i kemi informuar që të ndërhyjnë në 21 shkolla, ku sistemi i kaldajës ka nevojë për riparime apo furnizim me lëndë djegëse. Në disa shkolla të zyrave arsimore Dibër dhe Devoll, ku temperaturat janë tepër të ulëta, orët e mësimit janë reduktuar me 10 minuta”, nënvizoi Kushi.