Operacion “blic” në shumë qytete për të kapur “bosët” e krimit në vend, policia del sërish duarbosh, ja cilët kërkoheshin për t’u kapur

Policia e Shtetit nuk ia doli ditën e djeshme të arrestonte asnjë prej të shumëkërkuarve të zbuluar nga dëhsmitë e organizatorit të vrasjeve me pagesë dhe bashkëpuntorit të drejtësië Nuredin Dumani. Me urdhër të drejtorit të Policisë së Shtetit Muhamet Rrumbullaku, u kryen kontrolle në banesat e shumë pjesëtarëve të rrezikshëm të kontigjentit kriminal në Shqipëri, të akuzuar e kërkuar për trafik droge, grupe të strukturuara kriminale, grabitje, vrasje etj. FNSH, RENEA dhe forca të tjerë të rendit ushtruan kontrolle në shtëpitë dhe bazat në Vlorë, Shkodër, Tiranë, Fushë-Krujë, Kurbin, Durrës, Elbasan dhe Cërrik. Operacioni ka qenë “blic” pa vendim gjykate. Asnjë prej të shumëkërkuarve të “Plumbit të artë” apo dhe elementë të tjerë kriminalë të shpallur në kërkim gjatë këtij viti si: Ervis Martinaj, Festim Qoli, Lulzim Berisha, Kevin Suçi, Agron Bejdolli, Aleksandër Laho (Rrumi i Shijakut), Alban Skonja, Kamer Mehja, Abedin Mama (Dine Çami), Suel Çela, Talo Çela, Duel Mehmedaj, Astmer Bilali, Bajram Çekorja, Alban Bengasi, etj., nuk u arrit të kapej, edhe pse për shumë prej tyre ka mëse 1 vit që kërkohen për vepra të rënda penale. Disa prej tyre si Lulzim Berisha, Ervis Martinaj, etj. mendohet se janë larguar nga Shqipëria. Që prej muajit mars kur nisi “Plumbi i artë” nuk është kapur asnjë prej të konsideruarve si krerët e krimit në vendin tonë.