Preken nga aksi Thumanë-Kashar, banorët e Bërxullës tentojnë të bllokojnë rrugën e Rinasit, përplasen me policinë: Duam vlerën e pronës sipas çmimit të tregut

Banorët e Bërxullës, pronat e të cilëve preken nga ndërtimi i aksit Thumanë-Kashar, kanë protestuar sërish dje, ndërsa kanë tentuar që të bllokojnë rrugën e Rinasit. Gjatë momentit kur kanë tentuar të bllokojnë njërin aks të rrugës, policia ka ndërhyrë duke i larguar me forcë. “Këto njerëz që heshtin, neglizhojnë dhe nuk duan të vijnë të bëjnë negociata me banorët e Bërxullit, mos ta marrin kaq të lehtë, pasi do të rezistojmë deri në pikën e fundit të gjakut dhe kjo rrugë nuk do të ndërtohet. Ju faleminderit juve mediave, pasi ne për pushtetarët kemi vdekur”, deklaroi një nga banorët. Ndërkohë banorët pretendojnë se nuk kanë marrë asnjë njoftim lidhur me projektin, e as për shpronësimet. Sipas tyre, kompania Gener2 që ka fituar koncesionin, ka nisur punën në terren pa pasur një leje ndërtimi dhe në kundërshtim me ligjin duke theksuar se dëmshpërblimi i ofruar është qesharak. Banorët kërkojnë vetë diskutime dhe konsultim publik, duke paralajmëruar se protestat e tyre do të jenë të pandalshme derisa e drejta të fitojë. Ato paralajmëruan firmën kontraktore se nëse do të futet që të ndërtojë rrugën në pronat e tyre, ato nuk do t’i lejojnë. Banorët thanë se nuk do ta falin tokën për interesat e pushtetarëve dhe të oligarkëve. “Ne kemi rregullat tona dhe ligjet tona. Këtë tokë nuk do ta falim për interesa të pushtetarëve dhe oligarkëve. Kjo rrugë do të ketë fatin e Kalasë së Shkodrës. Do të bëhet me lapidar pa filluar punimet. Kërkojmë vlerësimin sipas tregut dhe pajisjen me certifikatë. Firma ka zhvilluar 17% të punimeve, pa marrë lejen akoma”, u shprehën një nga banorët. Kujtojmë se banorët e Bërxullës janë ngritur disa herë në protestë. Më herët ato thanë se nuk janë kundër projektit, por problematika sipas tyre është te vlera e tokës dhe banesës. Sipas banorëve, rrezikohen 20 banesa nga projekti dhe qeveria nuk ka një vendim për zhvendosjen e tyre.