Shfrytëzonte lokalin në Fier për prostitucion, pranga administratores, nën hetim një vajzë dhe dy djem

Policia e Fierit ka arrestuar dje administratoren e një lokali, i cili akuzohet se shfrytëzonte biznesin e tij për prostitucion. Në një njoftim për media, blutë bëjnë me dije se në pranga ka rënë shtetasja Y. N. (XH)., 43 vjeçe, banuese në Fier, për veprat penale “Mbajtja e lokaleve për prostitucion” dhe “Shfrytëzimi i prostitucionit”. “Specialistët e Seksionit për Hetimin e Trafiqeve të Paligjshme të Drejtorisë Vendore të Policisë Fier, mbështetur nga inteligjenca informative, për një ambient (lokal) të vënë në dispozicion të ushtrimit të veprimtarisë së kundërligjshme të prostitucionit, si dhe në bazë të provave të siguruara si rezultat i një hetimi disamujor, në bashkëpunim me Prokurorinë e Fierit, kanë organizuar dhe finalizuar operacionin policor të koduar “Penaliteti”. Si rezultat i këtij operacioni, u ekzekutua masa e sigurisë “Arrest në burg”, caktuar nga Gjykata e Shkallës së Parë Fier, për shtetasen Y. N. (XH)., 43 vjeçe, banuese në Fier, për veprat penale “Mbajtja e lokaleve për prostitucion” dhe “Shfrytëzimi i prostitucionit””, thuhet në njoftim. Më tej policia zbuloi ka proceduar penalisht edhe një vajzë dhe dy djem. “Gjithashtu, u proceduan penalisht, për veprën penale “Prostitucioni”, një shtetase 27 vjeçe dhe 2 shtetas të tjerë, 26 vjeç dhe 35 vjeç, në hetim për implikim në këtë veprimtari të kundërligjshme. Vijon puna për identifikimin dhe nxjerrjen përpara përgjegjësisë penale, të shtetasve të tjerë të implikuar në këtë veprimtari. Materialet procedurale i kaluan Prokurorisë pranë Gjykatës së Shkallës së Parë Fier, për veprime të mëtejshme”, sqaroi policia. Ndërkohë dje një 71-vjeçar në fshatin Buzëmadh të Fierit është vënë nën hetim, pasi dyshohet se ka ngacmuar seksualisht një vajzë 26-vjeçare . Materialet në ngarkim të 71-vjeçarit, i identifikuar vetëm me iniciale F.L., u referuan në Prokurorinë e Rrethit Gjyqësor Fier për veprën penale “Ngacmimi seksual”.