Shkatërrohet rrjeti i kultivimit të drogës në Dibër, arrestohen 14 persona, kryeplaku i fshatit organizonte punën

Nën drejtimin e Prokurorisë Mat është finalizuar operacioni “KEPI I VOZAJVE”. Nga operacioni i zhvilluar nga DVP Dibër, Tiranë, Durrës, FNSH Tiranë dhe Komisariati i Matit, u godit një grup kriminal për prodhimin e narkotikëve. Si rezultat ranë në pranga 14 persona dhe u shpall në kërkim një tjetër. Nga veprimet hetimore është arritur të vërtetohet se personat e arrestuar dhe ai i shpallur në kërkim funksiononin si një grup i mirëorganizuar. Këta persona kanë kultivuar në kohë të ndryshme bimë narkotike, të cilat në 5 raste janë konstatuar nga policia. “Këta shtetas në zonën malore Lam i Madh, njësia Administrative Derjan, Mat, kanë kultivuar në kohë dhe vende të ndryshme një sasi bimësh narkotike. Dhe konkretisht, janë identifikuar e asgjësuar nga policia këto raste: Më datë 27.09.2019, janë konstatuar gjithsej 89 bimë. Më datë 01.10.2019, janë konstatuar gjithsej 95 bimë. Më datë 04.09.2020, janë konstatuar gjithsej 99 bimë. Më datë 15.09.2020, janë konstatuar gjithsej 61 bimë. Më datë 17.09.2020, janë konstatuar gjithsej 188 bimë, si dhe janë konstatuar 3633 bimë në proces tharje”, njoftoi policia. Organizator i kësaj veprimtarie kriminale rezultoi të ishte G.K., kryeplak i fshatit Lam i Madh, i cili organizonte punën së bashku me familjarët e tij. “Nga hetimet e kryera ka rezultuar se organizator i kësaj veprimtarie është shtetasi G. K., i cili ka mbajtur dhe detyrën e kryetarit të fshatit Lam i Madh ku nëpërmjet personave të lartpërmendur, me të cilët ka lidhje familjare dhe fisnore, organizonte punën për kultivimin e lëndëve narkotike, përpunimin e saj dhe më pas gjetjen e tregut për shitje, të cilën e siguronte nëpërmjet djemve të tij shtetasve V. K. dhe G. K., të identifikuar edhe si transportues të saj”, tha policia. Në cilësinë e provës materiale janë sekuestruar një armë zjarri automatik, një armë gjahu teke, të dyja armët pa leje si dhe municion luftarak. Po ashtu u sekuestruan 13 telefona celularë që përdoreshin nga personat e përfshirë në veprimtarinë kriminale.

Të arrestuarit

Nga 14 personat e akuzuar si dhe personi i shpallur në kërkim, vihet re se pjesa më e madhe e tyre rezultojnë të jenë banues në Tiranë. “U finalizua me sukses megaoperacioni policor i koduar “KEPI I VOZAJVE”, si rezultat i të cilit u bë arrestimi dhe ekzekutimi i masave të sigurisë “Arrest me Burg”, për shtetasit: G. K., 55 vjeç, banues në fshatin Lam i Madh, Njësia Administrative Derjan, Mat; M. K., 45 vjeç, lindur në fshatin Lam i Madh, banues në Paskuqan, Tiranë; I. K., 43 vjeç, lindur në fshatin Lam i Madh, banues në Paskuqan, Tiranë; A. K., 40 vjeç, banues në fshatin Lam i Madh; V. K., 30 vjeç, lindur në fshatin Lam i Madh, banues në Paskuqan, Tiranë; G. K., 26 vjeç, banues në fshatin Lam i Madh; L. K., 62 vjeç, lindur në fshatin Lami i Madh, banues në Laprakë, Tiranë; A. K., 29 vjeç, lindur në fshatin Lami i Madh, banues në Kamëz, Tiranë; B. K., 36 vjeç, lindur në fshatin Derjan, banues në Kamëz, Tiranë; A. H., 48 vjeç, lindur në fshatin Lam i Madh, banues në Kamëz, Tiranë; F. D., 36 vjeç, lindur në fshatin Macukull, banues në Njësia Bashkiake Nr.5, Tiranë; L. K., 62 vjeç, lindur në fshatin Lami i Madh, banues në Kamëz, Tiranë; R. Xh., 52 vjeç, lindur në fshatin Lam i Madh, banues në Kamëz, Tiranë; G. Xh., 39 vjeç, lindur në fshatin Lam i Madh, banues në Kamëz, Tiranë.

Dhe është shpallur në kërkim policor shtetasi B. Xh., 54 vjeç, lindur në fshatin Lam i Madh, banues në Kamëz, Tiranë”, njoftoi policia pas finalizimit të operacionit. personat e arrestuar akuzohen për veprat penale “Kultivim i bimëve narkotike”, “Prodhim dhe shitje të narkotikëve” të kryera në bashkëpunim, “Mbajtje pa leje dhe prodhim i armëve, i armëve shpërthyese dhe i municioneve”.