“Është e pamundur ta gjurmosh”, gazetarja tregon programet që përdorin kriminelët për trafik dhe vrasje: Është shumë i lehtë!

Për t’iu shpëtuar përgjimeve, kriminelët përdorin aplikacione dhe mënyra të reja për të komunikuar me personazhe të tjerë të botës së krimit.

Gazetarja Dorjana Bezat, e ftuar mëngjesin e sotëm në “Wake Up”  tregoi se ekzistojnë disa aplikacione janë pa server, të tilla si “Matrix”, “Sky”, “EnchroChat”, të cilat nuk mund të gjurmohen.

“Jo vetëm në rastin Dumani, por në raste të tjera qoftë nga hetimet në Europë, qoftë edhe në Shqipëri, krimi ecën një hap përpara. Qoftë në makina të shtrenjta, telefona, aplikacionet e papërgjueshme përdoren  më parë nga kriminelët, pastaj nga autoritetet. Rasti i parë ishte ai i “EnchroChat”, ai që u përdor masivisht nga grupet kriminale. Aplikacioni “Sky” e kishte në përshkrim që ishte i papërgjueshëm, kjo solli dhe në arrestimin e drejtorit ekzekutiv. Thyerja e këtij aplikacioni solli në arrestime të shumta, mes tyre edhe shqiptarë. Rasti më i fundit është “Matrix” që është rrjet i hapur, mund ta ketë kushdo. Është shumë i lehtë për t’u përdorur, nuk kërkon të dhëna. Ti ke në dorë për ta ndërtuar, duke pasur akses pa pasur numwr telefoni, vetëm lidhje internet. Kjo ka ndihmuar grupet kriminale, pasi është e pamundur ta gjurmosh sepse nuk ka një server”, tha gazetarja.