Shtimi i trupave të KFOR, reagon Haradinaj: Terrorizmi nuk kalon, duhet hetim ndërkombëtar

Ish-kryeministri i Kosovës, Ramush Haradinaj, ka reaguar në lidhje me shtimin e trupave të KFOR-it në Veri.

Përmes një postimi në llogarinë e tij në rrjetin social Facebook, Haradinaj thotë se shtimi i numrit të pjesëtarëve të KFOR-it në Kosovë dëshmon vendosmërinë e NATO-s, se terrorizmi nuk kalon.

Haradinaj shton se paqja në Kosovë është vendosur me dhimbje e tragjedi dhe nuk do të lejohet askush ta rrezikojë atë.

“Shtimi i numrit të pjesëtarëve të KFOR-it, brenda mandatit që ka, dëshmon vendosmërinë e NATO-s se terrorizmi nuk kalon. Paqja në Kosovë e në Ballkan është vendosur me shumë dhimbje e tragjedi dhe prandaj nuk do të lejojmë askënd që ta rrezikojë atë. Si Kosovë qëndrojmë fuqishëm në mbështetje të të drejtave politike të të gjitha komuniteteve, edhe të komunitetit serb, kjo në bazë të Kushtetutës, ligjeve të Kosovës dhe në bazë të planit Franko- Gjerman të përkrahur nga Amerika”, ka pohuar Haradinaj në postimin e bërë në Facebook,

Gjithashtu Haradinaj theksoi se faktet e dala në dritë tregojnë implikimin e Serbisë mbi sulmin ndaj policisë së Kosovës në Basnjkë.

Haradinaj kërkoi një hetim ndërkombëtar për të vënë përballë përgjegjësisë përgjegjësit.

“Prandaj kërkohet një hetim ndërkombëtar për të zbardhur skenarët e destabilizimit, jo vetëm të Kosovës por edhe të Ballkanit dhe për te nxjerrur para drejtësisë të gjithë ata që kanë qenë të përfshirë në këto sulme terroriste”, tha ai.