SPAK arreston 29 persona dhe konfiskon mijëra euro gjatë muajit qershor, prokurori i ONM përplaset me KPA pas konfirmimit në detyrë të gjyqtarit Gerd Hoxha

Struktura e Posaçme e Anti-Korrupsion në një bilanci të publikuar së fundmi për muajin qershor, raporton se ka  janë dërguar për gjykim 3 procedime penale me 26 persona të pandehur. Sipas SPAK, pas kërkesave përfundimtare të prokurorëve të posaçëm janë dhënë nga Gjykata e Posaçme 5 vendime themeli, janë deklaruar fajtorë 29 të pandehur. “Mbi disa tregues statistikorë të punës së Prokurorisë së Posaçme për muajin QERSHOR 2022”. Gjatë muajit Qershor 2022: Janë paraqitur 12 kallëzime penale, nga të cilat për 5 kallëzime është vendosur mosfillim i hetimeve. Janë regjistruar 7 procedime penale, nga të cilët 2 procedime për vepra penale që lidhen me krimin e organizuar dhe 5 procedime për vepra penale që lidhen me korrupsionin. Janë dërguar për gjykim 3 procedime penale me 26 persona të pandehur, nga të cilat, 2 procedime me 25 të pandehur për vepra penale që lidhen me krimin e organizuar dhe një procedim me një të pandehur për vepra penale që lidhen me korrupsionin. Bazuar në kërkesat e paraqitura nga Prokuroria e Posaçme është miratuar nga Gjykata e Posaçme një masë sigurimi personal ndaj një personi nën hetim. Pas kërkesave përfundimtare të prokurorëve të posaçëm janë dhënë nga Gjykata e Posaçme 5 vendime themeli, janë deklaruar fajtorë 29 të pandehur. Janë kthyer 54 përgjigje për shkresa të ardhura nga institucione të ndryshme lidhur me statusin e shtetasve dhe zyrtarëve publikë shqiptarë në raport me procedimet penale ndaj tyre. Janë ekzekutuar 6 vendime penale të formës së prerë si dhe janë nxjerrë 22 urdhra ekzekutimi për persona të dënuar nga Gjykata e Posaçme të Shkallës së Parë për Korrupsionin dhe Krimin e Organizuar Tiranë”, thuhet në njoftim.

Sekuestrimi i pasurive

Sa i përket sekuestrimeve, SPAK bën të ditur se janë nxjerrë urdhra ekzekutimi për konfiskimin e pasurive të luajtshme si 6 automjete, 82 aparate celular të markave të ndryshme, 6 laptopë. Po ashtu janë sekuestruar 303.800 (treqind e tremijë e tetëqind ) mijë lekë, 20.074 (njëzetmijë e shtatëdhjetë e katër) EURO, 1.005 (njëmijë e pesë) paund (GBP), 12.000(dymbëdhjetë) mijë dollarë, 2200 (dymijë e dyqindtë) franga. “Janë nxjerrë urdhra ekzekutimi për konfiskimin e pasurive të luajtshme si më poshtë: Automjete 6 copë; Aparate celulare  82 copë të markave të ndryshme; Laptop 6 copë. Janë nxjerrë urdhra ekzekutimi për konfiskimin e Vlerave Monetare si më poshtë: 303.800 (treqind e tremijë e tetëqind ) mijë lekë; 20.074 (njëzetmijë e shtatëdhjetë e katër) EURO; 1.005 (njëmijë e pesë) paund (GBP); 12.000(dymbëdhjetë) mijë dollarë; 2200 (dymijë e dyqindtë) franga. Janë miratuar nga prokurorët e posaçëm 30 vendime për miratim takimesh të të paraburgosurve me familjarët e tyre dhe 3 vendime për lejimin e kryerjes së bisedave telefonike. Janë vënë në ekzekutim 3 letërporosi të ardhura nga autoritetet e huaja gjyqësore; janë dërguar 7 letërporosi për ekzekutim autoriteteve të huaja. Janë mbajtur 4 takime koordinuese palë në marrëveshjet në kuadër të skuadrave të përbashkëta hetimore me autoritetet e huaja. Është dërguar dokumentacioni pranë Ministrisë së Drejtësisë me qëllim ekstradimin e 3 shtetasve shqiptarë nga jashtë vendit në Republikën e Shqipërisë. U është kthyer përgjigje e plotë 24 (njëzetë e katër) kërkesave për informacion brenda muajit Qershor 2022”, thuhet në njoftimin e SPAK.

ONM sherr me KPA

Nga ana tjetër Kolegji i Posaçëm i Apelimit ka konfirmuar dje në detyrë gjyqtarin Gerd Hoxha. Komisioni i Pavarur i Kualifikimit vendosi më 3 qershor 2021 konfirmimin në detyrë të Gerd Hoxhës, duke konstatuar se nuk ka probleme në tre shtyllat e verifikimit si ana profesionale, aspekti i pastërtisë së figurës dhe pasurisë. Por kjo nuk ka bindur vëzhguesit ndërkombëtar të ONM, të cilët kanë kërkuar sot ankimimin e vendimit përmes Komisionerit Publik. Por konfirmimi i Gerd Hoxhës u kundërshtua nga përfaqësuesi i ONM, Theo Jacobs, i cili teksa theksoi se drejtësia duhet të bazohet në fakte nënvizoi se kjo nuk është drejtësia që meritojnë shqiptarët e as Apeli. Po pavarësisht ndërhyrjes së tij, në seancën e Apelit nuk pati debate, pas deklaratës së tij gjyqtarja tha se vendimi ishte marrë. Në emër të  shërbimit ndërkombëtar e kundërshtoj që ky vendim të ketë fuqi. Drejtësia është një gjë që shërbehet ky veprimet bazohen në fakte. Kolegji i Posaçëm i Apelit dhe shqiptarët meritojnë më tepër se ky vendim”, deklaroi Theo Jacobs.

ONM kërkoi shkarkimin e gjyqtarit Hoxha

Operacioni Ndërkombëtar i Monitorimit u paraqiti Komisionerëve Publikë rekomandimin për të ankimuar vendimin në Kolegjin e Posaçëm të Apelimit për gjyqtarin Gerd Hoxha. Komisioneri Publik, Darjel Sina u qëndroi të gjitha shkaqeve të ankimit, duke e konsideruar jo të plotë dhe në përputhje me provat, hetimin e kryer në shkallën e parë të vetingut. Ai e cilësoi vendimin e KPK të cenueshëm dhe kërkoi rivlerësimin e pasurive, hetimin e mëtejshëm të tyre si dhe rikryerjen e analizës financiare. Sipas ONM një apartament me sipërfaqe 125 m2 në Tiranë në vitin 2011, në bashkëpronësi me ish-bashkëshorten, subjekti ka deklaruar se ka paguar individualisht shumën 6.5 milionë lekë. Hoxha ka sqaruar se gjysma e apartamentit i është dhuruar ish-bashkëshortes nga pala shitëse, për shkak të marrëdhënies së posaçme mes tyre. Vëzhguesi ndërkombëtar, Theo Jacobs vërejti se në vitin 2011 rezultonte një rivlerësim i apartamentit në shumën 23 milionë lekë. Sipas tij, dukej se pala shitëse i kishte dhuruar një vlerë 5 milionë lekë edhe vetë subjektit të rivlerësimit. Hoxha e kundërshtoi këtë konstatim duke theksuar faktin se nuk bënte pjesë në shkaqet e ngritura në ankimin e Komisionerit. Ai kundërshtoi edhe konstatimin se e kishte përdorur banesën përpara deklarimit. Si argument për këtë pretendim, Hoxha solli në vëmendje aktet e dorëzuara për marrjen e kredisë kur rezultonte se apartamenti kishte qenë i pabanueshëm.