Tensionohet situata në veri të Kosovës, plagoset efektivi i policisë në Mitrovicë

Prej disa ditësh situata në veri të Kosovës është tensionuar. Në Mitrovicën e Veriut ka pasur të shtëna me armë, shpërthime granatash, por edhe presione ndaj zyrtarëve të KQZ-së. Në orët e vona të së enjtes në lagjen e Boshnjakëve në Mitrovicë është plagosur edhe një efektiv policie, ndërsa mëngjesin e së premtes janë sulmuar edhe dy gazetarë.

Nisur nga kjo situatë, qeveria e Kosovës ka vendosur të dislokojë një numër më të madh trupash policor me qëllim ruajtjen e sigurisë së qytetarëve. Këtë e tha edhe ministri i Brendshëm Xhelal Sveçla, i cili siguroi se rritja e prezencës së trupave të policisë nuk ka për qëllim acarimin e situatës, por qetësimin e saj.

Ndërsa nga ana tjetër, shefi i Zyrës për Kosovën në Qeverinë e Serbisë, Petar Petkoviç, ka thënë se “Policia e Kosovës nuk ka të drejtë të shkojë në veri dhe se Serbia “do të shqyrtojë dërgimin e 1000 forcave të saj të sigurisë” në veri.

Përfaqësuesit e serbë dhanë dorëheqje në fillim të nëntorit, në shenjë kundërshtimi ndaj një vendimi të Qeverisë së Kosovës për të riregjistruar makinat me targa ilegale serbe në veri.

Kjo solli edhe caktimin e një date zgjedhjesh nga presidentja Osmani, e cila vendosi 18 dhjetorin si datën më të përshtatshme. Në katër komunat në veri – Mitrovicë e Veriut, Leposaviç, Zveçan dhe Zubin Potok pritet të mbahen zgjedhjet lokale, por Lista Serbe që është partia më e madhe e serbëve në Kosovë, e cila ka mbështetjen e Beogradit zyrtar, kundërshton mbajtjen e tyre.

Duke marrë parasysh situatën e krijuar, ambasadori amerikan në Kosovës, Hovenier, kërkoi shtyrjen e këtyre zgjedhje deri në normalizimin e situatës.