Tjetërsimi i pronave në Dhërmi, Gjykata e Lartë kthen në “arrest shtëpie” biznesmenin Helidon Gjikoka, arrestohet në Berat 41-vjeçari i shpallur në kërkim për vrasje

Gjykata e Lartë ka urdhëruar ditën e djeshme Policinë e Vlorës të arrestojë dhe mbajë në masën e sigurisë “arrest në shtëpi” biznesmenin e kompleksit “Ambel Beach”, Helidon Gjikoka. Dyshohet se biznesmeni nuk ndodhet në Shqipëri, pasi është larguar në drejtim të Anglisë. Vendimi është marrë nga treshja gjykuese, Ilir Panda, Sokol Binaj dhe Sandër Simoni, të cilët pasi shqyrtuar rastin vendosën të prishin vendimin e Gjykatës së Apelit Vlorë që caktonte masën e sigurisë "detyrim paraqitje" për Gjikokën dhe lënien në fuqi të vendimit të datës 4 Maj 2022 të Gjykatës së Shkallës së Parë, e cila ka caktuar masën e sigurisë “arrest shtëpie”. Biznesmeni, Helidon Gjikoka, është marrë i pandehur për akuzën e “Mashtrimit me pasoja të rënda” dhe “Falsifikimit të dokumenteve”, pasi ka arritur të tjetërsojë një sipërfaqe toke prej 1430 m2 në bregdetin e Dhërmiut. Mbi këtë sipërfaqe të përfituar me dokumenta të falsifikuara, Gjikoka ka ndërtuar disa kabina druri, duke krijuar kompleksin turistik “Ambel Beach”.

Arrestohet një 41-vjeçar në Berat

Nga ana tjetër, dje një 41-vjeçar me inicialet Dh.Gj.(P.), banues në Kuçovë, është vënë në pranga, pasi ishte shpallur në kërkim për veprën penale “Vrasja me dashje” e mbetur në tentativë. Në njoftimin e policisë bëhet me dije se Gjykata e Rrethit Gjyqësor Berat, me vendimin e datës 31.05.2022, i ka caktuar masën e sigurisë “Arrest në burg” me vendimin e datës 31.05.2022. “Në vijim të punës për kapjen e personave të shpallur në kërkim dhe vënien e tyre përpara përgjegjësisë penale, shërbimet e DVP Berat, bazuar dhe në informacionet e siguruara nga inteligjenca informative për vendndodhjen e një shtetasi të shpallur në kërkim, kanë kapur dhe ndaluar shtetasin në kërkim Dh.Gj.(P.), 41 vjeç, banues në Kuçovë, pasi Gjykata e Rrethit Gjyqësor Berat, me vendimin e datës 31.05.2022, i ka caktuar masën e sigurisë “Arrest në burg”, për veprën penale “Vrasja me dashje” e mbetur në tentativë. Ky shtetas, në muajin maj 2022, në lagjen “30 Vjetori”, Berat, ka goditur me sende të forta shtetasin V. B”, njoftoi policia.

Prangoset një 43-vjeçar në Vlorë

Po ashtu, një 43-vjeçar është arrestuar ditën e djeshme në Vlorë. Mësohet se 43-vjeçari ka qenë i dënuar në Greqi për kalim të kufirit të paligjshëm. Sipas policisë, shqiptari ka qenë i dënuar me 6 vjet, 8 muaj e 15 ditë burg. “Shërbimet e Komisariatit të Policisë Vlorë kanë kapur, në lagjen “Isa Boletini”, Vlorë, shtetasin në kërkim M. Ll., 43 vjeç, banues në Vlorë. Në vijim të veprimeve, specialistët për Hetimin e Trafiqeve dhe Narkotikëve bënë ndalimin e këtij shtetasi, pasi Gjykata e Shkallës së Parë Vlorë, me vendimin e datës 28.12.2021, ka njohur vendimin penal të Gjykatës Njëantarëshe të Krimeve të Selanikut, Greqi, e cila e ka dënuar 43-vjeçarin, me 6 vjet, 8 muaj e 15 ditë burgim, për veprën penale “Ndihma për kalim të paligjshëm të kufirit”, thuhet në njoftimin e policisë. Ndërkohë, një 47 vjeçar është arrestuar dje nga policia, pasi ushtroi dhunë fizike ndaj bashkëshortes së tij. Policia njofton se ngjarja ka ndodhur në fshatin Sheqeras të Maliqit. “Specialistët për Hetimin e Krimeve të Komisariatit të Policisë Maliq arrestuan në flagrancë shtetasin S. Ll., 47 vjeç, banues në fshatin Sheqeras, Maliq, për veprën penale “Dhuna në familje”, pasi ka ushtruar dhunë fizike ndaj bashkëshortes së tij, në banesë. “, njoftoi policia.

Somario

Mashtrimit me pasoja të rënda” dhe “Falsifikimit të dokumenteve”, pasi ka arritur të tjetërsojë një sipërfaqe toke prej 1430 m2 në bregdetin e Dhërmiut. Mbi këtë sipërfaqe të përfituar me dokumenta të falsifikuara, Gjikoka ka ndërtuar disa kabina druri, duke krijuar kompleksin turistik “Ambel Beach”...