Tronditen qytetarët e Fierit/ “Ka marrë 10-15 plagë në qafë, kraharor dhe bark”, zbulohet gjendja shëndetësore e nënës që u qëllua me thikë nga djali i saj (DETAJE)

Qytetarët e Fierit janë tronditur mëngjesin e sotëm nga një ngjarje e rëndë, ku një 30-vjeçar ka goditur me thikë nënën e tij. Është bërë e ditur se Klaudio Çobaj ka qëlluar disa herë në drejtim të Donika Çobaj.

Sipas policisë, ngjarja ka ndodhur pas një konflikti mes dyshes ndërkohë që menjëherë pas ngjarjes 30-vjeçari është larguar në drejtim të paditur.

Kjo ngjarje e rëndë u diskutua ditën e sotme në emisionin “Shqipëria Live” në Top Channel, ku në lidhje telefonike ishte, nëndrejtori i Spitalit Fier, Ramadan Çepele.

Ky i fundit zbuloi se 50-vjeçarja ka marrë rreth 10-15 goditje me thikë nga i biri, në qafë, bark dhe kraharor. Sipas tij, mjekët e spitalit Fier i kanë dhënë ndihmën e nevojshme dhe më pas kanë vendosur që ta transferojnë në Tiranë për trajtim më të specializuar.

“Ka pasur goditje në qafë, në kraharor dhe bark. Në këto kushte është dashur të bëhet një skaner. Nga konsulta e mjekëve tanë është marrë vendimi për ta dërguar në spitalin Nënë Tereza në Tiranë. Duhet një ndërhyrje më e specializuar.

Duhet të ndiqet hap pas hapi, nga ne është nisur në gjendje jo shumë të mirë. Ka marrë ndihmën e shpejtë, mjekët tanë e sollën në gjendje të stabilizuar.

Disa herë është goditur, ka marrë 10-15 plagë. Kur erdhi fliste, por në gjendje shumë të rëndë. E terrorizuar”, tha mjeku.