Vrasje e të moshuarës Afroviti Peçi, shërbyesja tregon se bashkëshorti i viktimës qe shumë i qetë, nipi pranon se gjyshja e kishte denoncuar gjyshin kohë më parë

Për vdekjen e tmerrshme të 80-vjeçares Afroviti Peçi në fshatin Pëllumbarë të Përmetit, e cila pretendohet se u vra nga burri i saj Leonidha Peçi, 82-vjeç, folën dje për “News 24”, shërbyesja dhe nipi i çiftit të moshuar. E para deklaroi për emisionin “Me Zemër të Hapur” se për vdekjen e së moshuarës tregoi vetë bashkëshorti i saj. Sipas shërbyeses, Leonidha Peçi ishte shumë i qetë gjatë dhënies së lajmit dhe nuk shfaqi asnjë shenjë pikëllimi. Më pas, ajo lajmëroi infermieren. Gjatë gjithë kohës pas ngjarjes, Leonidha Peçi nuk komunikoi me shërbyesen dhe infermieren e zonës. “Më njoftoi vetë Leonidha. Unë shkova pashë që kisha gjak dhe informova infermieren e fshatit. Ajo njoftoi policinë. Unë shkoja në mëngjes në orën 8:00, iu çoja qumështin. Biseda e fundit me Afrovitin ishte si gjithmonë, nuk më tregoi asgjë. Nuk isha e punësuar. Ndonjëherë iu çoja dhe gjellë se ishin vetëm. Kur u çova qumështin ishin të dy bashkë. Iu thosha ‘hajde të hamë bukë’ dhe ai i tha ‘Afroviti, hajde të hamë speca’. Unë nuk paguhesha nga familja, shkoja vetë pa pagesë, pa asgjë. Kur më tregoi, më tha se vdiq. I thashë se nga se vdiq, më tha se ishte rrëzuar, ‘hajde ta ngremë’. Unë nuk shkova ta ngrija. Ai ishte i qetë, as nuk qante. Nuk na foli fare mua e infermieres. Infermierja tha se ka mbaruar”, tha shërbyesja. Për çiftin Peçi foli dhe nipi i tyre po për “Me Zemër të Hapur”. Ai pranoi se viktima e kishte denoncuar bashkëshortin në polici para disa vitesh si dhe Leonidha kishte shfaqur sjellje jo të mirë. “Ka pasur denoncim nga e ndjera para disa vitesh. Kanë humbur dy fëmijët. Nuk e di nëse kanë pasur probleme të shëndetit mendor. E kemi kuptuar që gjyshi nuk ishte mirë, i bëmë të tëra. Nuk pinte”, tregoi dhe nipi i çiftit të moshuar Peçi. Sipas Policisë së Gjirokastrës, Afroviti Peçi u gjet e vdekur në banesë e dhunuar me shkop druri. Pas ngjarjes, Leonidha Peçi u arrestua dhe pësoi infarkt. Gjendja e tij shëndetësore paraqitet e stabilizuar.