Xhami i përparmë i makinës u gjet hapur, ja pistat ku dyshon Policia për vrasjen e efektivit të FNSH

Në orët e para të mëngjesit të sotëm është ekzekutuar me armë zjarri në aksin rrugor Lezhë-Milot, në afërsi të fshatit Gajush, efektivi i FNSH së Shkodrës, Xhulio Prela.

26-vjeçari është qëlluar me një plumb në gjoks, i cili ka prekur zemrën duke shkaktuar vdekjen e menjëhershme.

Raportohet se i riu po udhëtonte drejt qytetit të Shkodrës për të dërguar një person me të cilin ka komunikuar në telefon.

Sipas informacioneve, xhami i përparmë i makinës në anën e pasagjerit është konstatuar i hapur, duke hedhur dyshime se viktima mund të jetë takuar me autorin e vrasjes, pasi gjuajtja ka qenë shumë afër.

Gjithashtu, nuk përjashtohet nga pista e hetimit se vrasja mund të ketë ndodhur dhe për shkak të detyrës së 26-vjeçarit. Ndërkohë, mësohet se autoritetet kanë mundur të identifikojnë automjetin me të cilin është larguar autori dhe po punojnë për arrestimin e tij.