Zhdukja e Ervis Martinajt, eksperti i kriminalistikës plas deklaratën e fortë: Është gjallë, dyshohet se ka improvizuar vrasjen

Ditën e sotme forcat e FNSH dhe RENEA ushtruan një kontroll në banesën e Ervis Martinajt, ku u gjet një arsenal armësh i fshehur në kosheret e bletëve. 

Eksperti i Sigurisë Fatjon Softa tha se ky kontroll ishte i vonuar, pasi duhet të kishte ndodhur disa muaj më parë.

Ai gjithashtu u shpreh se Ervis Martinaj mund të jetë i gjallë dhe dyshon se ka improvizuar vrasjen.

“Duhet të ishte bërë patjetër kontrolli i banesës apo i gjithë vendeve të mundshme për të gjetur personin e për të zbuluar rrjetin. Megjithëse vonë, pati rezultat se policia gjeti arsenal armësh. Por e gjithë Shqipëria është arsenal armësh që janë në duart e grupeve kriminale që nuk i kanë vetëm për mbrojtje e krime por edhe aktivitete të tjera si shit-blerje. Historia ka treguar se në shumë vende kanë pasur dhe strehime të nëndheshme e kanë kaluar vite e vite. Duhet të kujtojmë se ka qenë një rast i ngjashëm në kryeqytet ku rastësisht është hequr një pjesë e banjos dhe poshtë përdorej si strehim. Nuk mendoj që ka qenë kjo në rastin konkret. Mendoj që ky person mund të jetë i gjallë dhe nuk është i vetmi që ka improvizuar vrasjen e zhdukjen. Për aq kohë sa nuk kemi kufomë, mund të themi se është ende në qarkullim”, tha Softa në intervistë me gazetarin Arbër Hitaj.