Amerikanët nxjerrin në skenë “gjuetarin nazist” që mund të çojë Vladimir Putinin drejt burgut

Shtetet e Bashkuara të Amerikës kanë futur në lojë “gjuetarin nazist”  që bën Vladimir Putinin “të dridhet”, pasi nëse ka prova të shumta për krime lufte ai mund të përfundojë në burg. Këtë herë jo për të gjuajtur ndjekësit e fundit të çmendurisë së Hitlerit, por për të nxjerrë kriminelët e tjerë para drejtësisë. Shtetet e Bashkuara do të dërgojnë një ekip special në Ukrainë për të ndihmuar autoritetet e Kievit të ndjekin penalisht masakrat e kryera gjatë pushtimit rus. Për të kapur përgjegjësit e këtyre tmerreve , shpesh të mbuluara nga vetë autorët, do të nevojiten prova të caktuara dhe hetime të thelluara, në mënyrë që të shtohen faktet në shkeljet e shumta të konstatuara tashmë. Amerikanët, pra, do të aktivizojnë një ekip të drejtuar nga Eli Rosenbaum, një veteran i Departamentit të Drejtësisë, i cili më parë kishte punuar me sukses në identifikimin e kriminelëve nazistë të luftës, duke fituar një reputacion si një “gjuetar nazist”.  Dërgimi i Rosenbaum në mbështetje të Kievit u njoftua nga Prokurori i Përgjithshëm i SHBA Merrick Garland gjatë një vizite të papritur në Ukrainë dje, më 22 qershor. “Unë jam këtu për të shprehur mbështetjen e palëkundur të Shteteve të Bashkuara për popullin ukrainas në mes të pushtimit të paprovokuar dhe të padrejtë rus,” tha Garland pas takimit me Prokuroren e Përgjithshme të Kievit, Iryna Venediktova në Krakovets. Më pas ai shtoi: “Amerika ka parë shumë imazhe të tmerrshme dhe ka lexuar rrëfimet rrëqethëse të brutalitetit dhe vdekjes që rezultoi nga pushtimi i padrejtë rus. Por nuk ka vend për të fshehur kriminelët e luftës”, përfundoi ai. Kjo pra është edhe arsyeja që SHBA ka marrë vendim për të dërguar në Ukrainë njeriun që për një karrierë të tërë ka qenë i përfshirë në gjurmimin e fajtorëve të mizorive të urdhëruara nga Hitleri.