Donald Trump paditet për dokumentet të klasifikuara, ish-presidenti fshehu regjistrime, dokumente, pengoi drejtësinë dhe nxori sekretet bërthamore të SHBA, rrezikon 100 vite burg

Një tjetër aktakuzë penale është ngritur kundër Donald Trump ditën e djeshme. Ish-presidenti amerikan, Donald Trump, do të paraqitet në një gjykatë federale në Miami të martën, pasi akuzohet për marrjen e dokumenteve të klasifikuara në pronën e tij në Florida. Këtë herë është një aktakuzë federale dhe për një krim edhe më të rëndë. Kështu, ish-presidenti amerikan hyn në histori si banori i parë i Shtëpisë së Bardhë që u fajësua dy herë, por edhe si personi i parë që u padit dy herë për një vepër penale. E treta, përpjekja për të ndikuar në rezultatin e zgjedhjeve presidenciale në shtetin federal të Gjeorgjisë, është ende duke u përgatitur. Sipas avokatit të tij, Trump po përballet me një aktakuzë të shumëfishtë në lidhje me mbajtjen e informacionit të mbrojtjes kombëtare dhe pengimin e drejtësisë. “Jam thirrur të paraqitem në Gjykatën Federale në Miami të martën. Nuk e kam menduar kurrë se një gjë e tillë mund t’i ndodhë një ish-presidenti të Shteteve të Bashkuara”, shkroi Trump në një postim në platformën e tij “Truth Social”. Aktakuza erdhi pas një hetimi njëmujor nga prokurori i posaçëm Jack Smith për të përcaktuar nëse Trumpi shkeli ligjin, duke mbajtur qindra dokumente të klasifikuara në pronën e tij në Mar-a-Lago dhe nëse ndërmori hapa për të penguar përpjekjet e qeverisë për t’i rimarrë ato. Prokurorët kanë thënë se ish-presidenti mori afërsisht 300 dokumente të klasifikuara në Mar-a-Lago, pasi u largua nga Shtëpia e Bardhë, duke përfshirë rreth 100 dokumente që u sekuestruan nga FBI-ja gushtin e kaluar gjatë një kontrolli të shtëpisë, që qartësoi peshën e hetimit të Departamentit të Drejtësisë.

Ja sa vite burg rrezikon

Ekspertët ligjorë amerikanë pretendojnë se Trump përballet me 100 vjet burg për shkak të seriozitetit të krimeve. Sigurisht, me kusht që ai të provohet fajtor. Në çdo rast, ka një lloj konsensusi midis ekspertëve ligjorë se kjo aktakuzë është dukshëm më e rëndë se ajo e prokurorit të mëparshëm të Nju Jorkut, Alvin Bragg , i cili akuzon Trump për përvetësim të një llogarie biznesi dhe shkelje të ligjit të financave zgjedhore për shkak të pagesa e parave për heshtje ndaj divës pornografike Stormy Daniels në 2016.

Zbardhet aktakuza për Donald Trump

Aktakuza federale e ish-presidentit Donald Trump dhe një bashkëpunëtori të tij, Walt Nauta, në hetimin e dokumenteve të klasifikuara është zbardhur.  Në pikën e parë, prokurorët vërejnë se si Trump kishte akses në "dokumentet më të ndjeshme të klasifikuara dhe informacionin e sigurisë kombëtare", duke përfshirë informacionin nga komuniteti i inteligjencës dhe Departamenti i Mbrojtjes. Në pikën e dytë të aktakuzës thuhet se: “Gjatë presidencës së tij, Trump mblodhi gazeta, copëza shtypi, letra, shënime, karta, fotografi, dokumente zyrtare dhe materiale të tjera në kuti kartoni që i mbante në Shtëpinë e Bardhë. Midis materialeve që Trump ruante në kutitë e tij ishin qindra dokumente të klasifikuara”. Në aktakuzë thuhet se letrat që Trump i ruajti në kutitë e tij “përfshinë informacion në lidhje me aftësitë e mbrojtjes dhe armëve të Shteteve të Bashkuara dhe vendeve të huaja; programet bërthamore të Shteteve të Bashkuara; dobësitë e mundshme të Shteteve të Bashkuara dhe aleatëve të saj ndaj sulmit ushtarak, dhe planet për hakmarrje të mundshme në përgjigje të një sulmi të huaj”.  Trump po përballet me dhjetëra akuza penale për fshehje të dokumenteve të klasifikuara. Ja cilat janë disa prej tyre: 31 akuza për mbajtje të qëllimshme të informacionit të mbrojtjes kombëtare. Një akuzë e komplotit për të penguar drejtësinë. Një akuzë për mbajtjen e burimit të një dokumenti ose regjistrimi. Një akuzë për fshehje të një dokumenti ose regjistrimi. Një akuzë për fshehjen e një dokumenti në një hetim federal. Një akuzë për krijimin e një skemës për të fshehur dokumentet.  Një akuzë për deklarata dhe paraqitje të rreme.