I shtruar prej javësh në spital, ndërron jetë ish-Presidenti italian Giorgio Napolitano

Ish-Presidenti italian Giorgio Napolitano u nda nga jeta sot në moshën 98-vjeçare. Javët e fundit gjendja shëndetësore e ish-kreut të shtetit italian ka qenë kritike dhe së fundmi është përkeqësuar.

Deputet që nga viti 1953 dhe eksponent kryesor i Partisë Komuniste Italiane, nga fundi i viteve 1980 ishte ndër protagonistët e tranzicionit të PCI drejt socializmit demokratik të stilit europian. Postet institucionale që ai mbajti më pas ishin të ndryshme dhe të rëndësishme: nga kryesia e Dhomës së Deputetëve (1992-1994) deri te funksionet e ministrit të Brendshëm dhe të koordinimit të mbrojtjes civile (1996 - 1998) në ekzekutivin e parë të kryesuar nga Romano Prodi.

Në maj 2006 ai u zgjodh në presidencën e republikës, duke marrë detyrën nga Carlo Azeglio Ciampi. Prandaj ai u bë në prill 2013, kreu i parë i shtetit në historinë e republikës që u rizgjodh nga Parlamenti për një mandat të dytë. Sidoqoftë, Napolitano u largua përfundimisht nga Quirinale në fillim të 2015.

Gjendja e tij shëndetësore filloi të lëkundet në vitin 2018, kur u shtrua me urgjencë në spital dhe iu nënshtrua një operacioni në aortë. Në maj të vitit të kaluar ai iu nënshtrua një operacioni abdominal në spitalin Spallanzani në Romë.