Kina i del në krah Putinit, mesazh SHBA, NATO dhe Bashkimit Evropian: Sanksionet arbitrare sjellin fatkeqësi në të gjithë botën

Presidenti kinez Xi Jinping ka kritikuar ditën e djeshme sanksionet e njëanshme, duke i përcaktuar si “arbitrare”, duke paralajmëruar "vendet kryesore të zhvilluara" në miratimin e politikave ekonomike "të përgjegjshme". “Faktet kanë treguar në mënyrë të përsëritur se sanksionet janë një “bumerang” dhe një “shpatë me dy tehe”. Ata që “politizojnë, shfrytëzojnë dhe armatosin ekonominë botërore, shfrytëzojnë dominimin e sistemit financiar dhe monetar ndërkombëtar për të vendosur sanksione arbitrare që në fund të fundit dëmtojnë të tjerët dhe mbarë botën”, është shprehur Jiniping. Presidenti kinez tha se për regjimin komunist ajo që ka më shumë rëndësi, sot dhe nesër, është stabiliteti. Kushti i vetëm që i lejon Kinës të rritet dhe të konsolidojë fuqinë e saj. Megjithatë, presidenti kinez paralajmëroi gjithashtu kundër “zgjerimit” të lidhjeve ushtarake. Kriza ukrainase “është një thirrje zgjimi”, shpjegoi Xi, duke rritur rreziqet e një “zgjerimi të aleancave ushtarake” dhe një “kërkimi për sigurinë e vet në kurriz të vendeve të tjera”. Nuk është rastësi që Kina, India dhe Afrika e Jugut abstenuan në një rezolutë të OKB-së që dënon pushtimin rus të Ukrainës, edhe për shkak se Pekini dhe Nju Delhi kanë lidhje të forta ushtarake dhe energjetike me Moskën. Kujtojmë se që nga pushtimi i Ukrainës nga Rusia, Kina ka kërkuar të qëndrojë neutrale ndaj konfliktit, duke bërë thirrje për një zgjidhje paqësore. Dhe në një telefonatë pak ditë më parë, presidenti i Kinës Xi Jinping e siguroi presidentin rus Putin për mbështetjen e Pekinit për “sovranitetin dhe sigurinë” e Moskës, sipas agjencisë së lajmeve AFP. Por SHBA-të kanë shprehur shqetësimin, duke paralajmëruar se kombet që mbështesin Putinin për pushtimin e tij në Ukrainë do të jenë “në anën e gabuar të historisë”.