Lufta në Ukrainë/ Von der Leyen ‘shpërthen’ ndaj Rusisë: Do mbajë përgjegjësi për krimet e saj. BE do e çoj çështjen në…

Presidentja e Komisionit Evropian, Ursula von der Leyen ka deklaruar se në Hagë do të ngrihet një qendër ndërkombëtare për ndjekjen e “krimit të agresionit” në Ukrainë, gjatë një vizite në Kiev, ditën e sotme.

“Rusia duhet të mbahet përgjegjëse në gjykatë për krimet e saj. Prokurorët nga Ukraina dhe Bashkimi Evropian tashmë po punojnë së bashku. Ne po mbledhim prova dhe si hap i parë, kam kënaqësinë të njoftoj se një qendër ndërkombëtare për ndjekjen penale të krimit të agresionit në Ukrainë do të ngrihet në Hagë”, tha presidentja e Komisionit të BE-së në Kiev, duke folur së bashku presidentin Volodymyr Zelensky.

Organizata e Kombeve të Bashkuara e ka përkufizuar agresionin si “përdorim të forcës së armatosur nga një shtet kundër sovranitetit, integritetit territorial ose pavarësisë politike të një shteti tjetër, ose në çdo mënyrë tjetër që nuk është në përputhje me Kartën e Kombeve të Bashkuara”.

“Kjo qendër do të koordinojë mbledhjen e provave, ajo do të përfshihet në ekipin e përbashkët hetimor i cili mbështetet nga Agjencia e Bashkimit Evropian për Bashkëpunim në Drejtësinë Penale. Kështu që ne do të jemi gati të nisim punën shumë shpejt me Eurojust-in, me Ukrainën, me partnerët e ekipit tonë të përbashkët hetimor si dhe me Holandën”, tha von der Leyen.

Ky njoftim vjen pasi Asambleja Parlamentare e Këshillit të Evropës, javën e kaluar votoi unanimisht për “kërkimin” e krijimit të një gjykate të posaçme ndërkombëtare për të ndjekur penalisht liderët politikë dhe ushtarakë rusë dhe bjellorusë “për krimin dhe agresionin e ushtruar në Ukrainë”.