Mbyllja e Qeverisë amerikane shmanget në çastin e fundit...

Qeveria e Shteteve të Bashkuara e ka shmangur mbylljen federale, pasi Dhoma e Përfaqësuesve dhe Senati u pajtuan për një marrëveshje financimi afatshkurtër të shtunën.

Një projektligj i cili e mban të financuar Qeverinë deri më 17 nëntor por në të cilin nuk përfshihet mbështetja e re për Ukrainën u miratua në Senat me 88 vota pro dhe nëntë kundër.

Presidenti Joe Biden e nënshkroi atë në ligj pak para se të skadonte afati në mesnatë.

“Ky është lajm i mirë për popullin amerikan,” tha Biden në një komunikatë.

Ky propozim u bë nga kryetari i Dhomës së Përfaqësuesve, Kevin McCarthy, i cili u përball me kundërshtime të mëdha nga ligjvënësit e ekstremit të djathtë nga partia e tij.

Mbyllja e Qeverisë, e cila do t’i çonte dhjetëra mijëra punonjës federalë në pushim pa pagesë dhe do t’i pezullonte shërbimet e ndryshme qeveritare, pritej të ndodhte më 1 tetor.

Por, kthesa dramatike ndodhi të shtunën mbrëma, pasi republikanët e Dhomës së Përfaqësuesve ia dolën ta miratojnë masën e financimit të përkohshëm, i cili do ta mbajë Qeverinë të hapur deri kah mesi i nëntorit dhe nuk do të bëjë më koncesione të mëdha për nivelet e shpenzimeve.

Kjo masë mori mbështetje më të madhe nga demokratët se nga republikanët, sepse hiç më pak se 90 republikanë votuan kundër saj.

Për një grup të vogël të republikanëve të ekstremit të djathtë kjo ishte një goditje e rëndë, të cilët kishin mbajtur bisedime në Dhomën e Përfaqësuesve me kërkesa këmbëngulëse për uljen e shpenzimeve.

Megjithatë, duke qenë se shumica e ligjvënësve ishin të vendosur për ta shmangur mbylljen, njëra nga kërkesat kryesore e këtij grup ndalja e financimit të luftës së Ukrainës kundër pushtuesit rus reflektohet në këtë projektligj./REL