"Mund të shkatërrojë një qytet të tërë", paralajmërimi i fortë: Asteroidi po i afrohet Tokës

Një shkëmb hapësinor me diametër gjysmë kilometri u zbulua nga astronomët rusë vetëm disa ditë para se të kalonte brenda një distancë relativisht të shkurtër nga Toka këtë javë.

Objekti 2022 SE37 u përfshi në listën e “asteroidëve potencialisht të rrezikshëm”, por nuk do të kërcënojë Tokën në të ardhmen e afërt, njoftoi Instituti Keldis i Matematikës së Aplikuar të Akademisë së Shkencave Ruse.

Për t’u klasifikuar si “potencialisht i rrezikshëm”, një asteroid duhet të jetë më i madh se 140 metra dhe t’i afrohet Tokës në një distancë prej më pak se 750,000 km.

Objektet me diametër mbi 100 metra mund të shkatërrojnë një qytet të tërë gjatë përplasjes, ndërsa asteroidet ose kometat me diametër mbi një kilometër do të bënin kërdinë në shkallë vendi ose kontinenti.

Sipas NASA-s, një tjetër asteroid i quajtur 2018 ER1, i cili ka një diametër prej 26 metrash, kaloi Tokën më 2 tetor në një distancë prej 560 mijë kilometrash, ndërsa të hënën, më 3 tetor, një shkëmb me diametër 10 metra do të kalojë në një distancë prej 160,000 kilometrash.

Duke pranuar se rreziku i një ndikimi të ardhshëm me Tokën është real, NASA javën e kaluar kreu eksperimentin e parë të mbrojtjes planetare, për të cilin anija kozmike DART u përplas me asteroidin Dimorph me qëllimin për të ndryshuar orbitën e tij.