Ndizet alarmi në Moskë, shpërthime të fuqishme në aeroportet ruse, 3 të vdekur dhe 6 të plagosur

Dy shpërthime të njëpasnjëshme kanë ndodhur dje në dy aeroporte ruse. Shpërthimi i parë ndodhi në aeroportin ushtarak rus të Ryazanit i cili ndodhet 200 km në juglindje të Moskës. Ky aeroport strehon qendrën e trajtimit për aviacionin me rreze të gjatë dhe avionët cisternë. Ndërsa shpërthimi i dytë ndodhi në aeroportin Engels pranë Saratovit. Saratov është pika fillestare e bombarduesve strategjikë të përdorur për sulmet në Ukrainë. Në këtë aeroport forcat ukrainase me anë të një droni kanë dëmtuar dy bombardues strategjikë Tu-95. Qeveria ukrainase nuk e ka konfirmuar sulmin, fenomen ky që është vënë re dhe në raste të tjera të shpërthimeve misterioze në territorin rus. Pas shpërthimeve Guvernatori i Saratovit, Roman Busargin, komentoi situatën në Telegram dhe u bëri thirrje banorëve që të jenë të qetë pasi në lagjet e banuara të qytetit nuk është regjistruar asnjë incident: ‘Të dashur qytetarë, rrjetet sociale dhe mediat po përhapin informacione për një zhurmë të fortë dhe vetëtima që kanë ndodhur. Informacionet për incidentet në bazat ushtarake, kontrollohet nga agjencitë e zbatimit te ligjit”, shkroi ai. Shpërthimet ndodhen pasi imazhet satelitore të publikuar javën e kaluar tregonin bombarduesit në bazën ajrore Engels, duke u përgatitur për një sulm në Ukrainë. Ende nuk ka asnjë konfirmim zyrtar për arsyen e shpërthimit. Kujtojmë gjithashtu se pak javë më parë, të paktën nëntë persona, përfshirë katër fëmijë, janë vrarë në një shpërthim gazi që tronditi një ndërtesë apartamentesh pesë-katëshe në Rusi. Incidenti ndodhi në ishullin Sakhalin në lindje të Rusisë, në një zonë të quajtur Tymovskoye. Sipas autoriteteve lokale, një bombol gazi ka shpërthyer në një nga banesat, duke shkaktuar shembjen e një pjese të ndërtesës.