Nën 'ethet' e rrezikut bërthamor, Putin i prerë: Nuk jemi të çmendur t’i përdorim të parët

Presidenti rus Vladimir Putin ka thënë se kërcënimi i një lufte bërthamore po rritej, por këmbënguli se Rusia nuk ishte “çmendur” dhe nuk do të përdorte armët e saj bërthamore e para.

Presidenti rus tha se vendi i tij do të përdorte vetëm armë të shkatërrimit në masë në përgjigje të një sulmi.

“Ne nuk jemi çmendur, ne jemi të vetëdijshëm se çfarë janë armët bërthamore. Ne nuk do të vrapojmë nëpër botë duke e tundur këtë armë si brisk” tha ai.

Putin gjithashtu u mburr se Rusia kishte armët bërthamore më moderne dhe më të avancuara në botë dhe e krahasoi strategjinë e saj bërthamore me SHBA-në.

“Ne nuk kemi armë bërthamore, përfshirë ato taktike, në territorin e vendeve të tjera, por amerikanët kanë në Turqi dhe në një numër vendesh të tjera evropiane,” tha Putin.

Duke folur në takimin vjetor të këshillit rus të të drejtave të njeriut, ai tha gjithashtu se lufta në Ukrainë mund të jetë një “proces i gjatë”.