Nuk i mbulonte luftën në Ukrainë, Letonia merr vendimin drastik për kanalin rus

Kanali i fundit televiziv i pavarur rus, TV Rain, është mbyllur në Letoni pas më pak se pesë muajsh transmetim pasi është akuzuar për shfaqjen e përmbajtjeve që mbështesin pushtimin e Ukrainës nga Moska.

Sipas BBC, TV Rain i ka quajtur “të padrejta dhe absurde” akuzat në një postim në rrjetet sociale ndërkohë që është urdhëruar ndërprerja e transmetimit më 8 dhjetor. TV Rain thotë se do t'i bindet urdhrit, por do të mbetet në YouTube, ku shumica e audiencës shikon përmbajtjen e tij. Megjithatë, nuk do të mund të transmetohet më në televizionin kabllor brenda Letonisë, e cila ka një popullsi të madhe rusishtfolëse.

Këshilli Kombëtar i Mediave Elektronike (NEPLP), rregullatori i medias në Leton, tha se vendimi për të hequr licencën ishte marrë "në lidhje me kërcënimet ndaj sigurisë kombëtare dhe rendit publik".

Në fillim të këtij muaji, rregullatori e gjobiti kanalin me 10,000 € për shfaqjen e një harte në të cilën Krimea e pushtuar tregohej si pjesë e territorit të Rusisë. Ajo u dënua gjithashtu për thirrjen e ushtrisë ruse "ushtria jonë" në një artikull rreth mënyrës se si të siguronte rekrutët me furnizime. Si rezultat, një nga drejtuesit e transmetuesit, Alexei Korostelyov, u pushua nga puna.

Vendimi është kritikuar nga shumë figura të opozitës në Rusi, të cilët argumentojnë se TV Rain është një burim i rëndësishëm informacioni i pavarur për rusishtfolësit rreth luftës.

"Ka Putin, i cili filloi luftën. Ka TV Rain, i cili tregon të vërtetën për Putinin dhe për luftën. Heqja e licencës së TV Rain vetëm e ndihmon Putinin," tha Kira Yarmysh, sekretare e shtypit e liderit të opozitës të burgosur Alexei Navalny. 

Organizata bamirëse Reporterët pa Kufij e quajti masën një "goditje serioze ndaj lirisë së informacionit".

Kanali, i cili ka qenë prej kohësh kritik ndaj Vladimir Putinit dhe qeverisë ruse, u bllokua në Rusi në fillim të marsit, vetëm disa ditë pasi Moska pushtoi Ukrainën. Shumë punonjës më pas u larguan nga Rusia dhe më vonë filluan punën për rindërtimin e Dozhdit jashtë vendit. Është një nga disa media të pavarura që i ka zhvendosur operacionet e saj jashtë Rusisë ose i ka pezulluar ato që nga pushtimi.