Paralajmërimi i frikshëm nga qendra amerikane: Putin po planifikon vrasjen e një presidenti europian! Çfarë pritet të ndodhë

Instituti Amerikan për Kërcënimet Globale ndaj Demokracisë ka paralajmëruar rreth  rrezikut të një skenari që përfshinë vrasjen e një presidenti europian.

Lajmi u bë publik nga qendra amerikane Robert Lansing, e cila citon udhëheqës brenda ushtrisë ruse si burime të mundshme të këtij informacioni.

Sipas tyre, është pikërisht presidenti bjellorus Aleksander Lukashenko i cili mund të vihet në shënjestrën e radhës së Putin – si një zgjidhje ‘radikale’ kjo për të detyruar Bjellorusinë t’i bashkohet luftës në Ukrainë.

“Me udhëzimet e presidentit rus Vladimir Putin pas kthimit të tij nga samiti i fundit i CSTO (Organizata e Traktatit të Sigurisë Kolektive), inteligjenca ushtarake ruse mund të tentojë në ditët në vijim të ndjekë një skenar që përfshin një tentativë për vrasjen e presidentit bjellorus, Alexander Lukashenko, ose një tentativë e mundshme për ekzekutimin e tij.

Qëllimi i këtij veprimi është për ta frikësuar atë që të urdhërojë përfundimisht trupat e tij që të përfshihen drejtpërdrejt në luftën kundër Ukrainës, përkrah trupave ruse”, thuhet në lajmërimin e institutit amerikan.

Ky raport vjen vetëm pak ditë pas lajmit se ministri i jashtëm i bjellorusisë Vladimir Makei u nda nga jeta në mënyrë misterioze dhe pa asnjë shkak zyrtar.

Agjencia bjelloruse e lajmeve Belta ka raportuar se Vladimir Makei “ka vdekur papritur” në moshën 64 vjeçare.

Makei ka mbajtur postin e tij në detyrë që nga viti 2012 dhe do të takohej të hënën me homologun e tij rus Sergei Lavrov.

Vetëm katër ditë para vdekjes së Ministrit të Jashtëm, ai kishte marrë pjesë në një konferencë të Organizatës së Traktatit të Sigurisë Kolektive (CSTO) – një bashkim ushtarak i disa shteteve postsovjetike – në Jerevan, Armeni.

Makei dikur ka qenë një kritik i madh i Rusisë. Para protestave masive antiqeveritare në Bjellorusi në vitin 2020, Makei foli për dëshirën e tij për të përmirësuar marrëdhëniet e Bjellorusisë me Evropën Perëndimore, si dhe për të kritikuar Rusinë por me kalimin e kohës ai e kishte zbutur ndjeshëm tonin e tij.