Pasi u shkarkua si shef i ChatGPT, Sam Altman merr pozicionin e rëndësishëm në Microsoft

Shefi i ChatGPT, Sam Altman u shkarkua të shtunën dhe tashmë bëhet me dije se ai i është bashkuar skuadrës së Microsoft.

Kjo i jep fund spekulimeve se ai mund të kthehet në OpenAI, aty ku përkohësisht e zëvendësoi shqiptarja Mira Murati. Ish-CEO i Twitch, Emmett Shear do të jetë ai që do të zërë vendin e Sam Altman.

Shefi ekzekutiv i Microsoft, Satya Nadella shkroi në X se Altman do t’i bashkohej Microsoft-it për të udhëhequr “një ekip të ri të avancuar të kërkimit të AI”.

Bordi e shkarkoi Sam Altman, 38 vjeç, të premten, duke thënë se kishte humbur besimin tek ai, por nuk specifikoi se për çfarë ai pretendohet se nuk ka qenë i sinqertë.

Të dielën në mbrëmje, bordi tha se “i qëndron vendosmërisht vendimit të tij si rruga e vetme për të avancuar dhe mbrojtur misionin e OpenAI”, sipas një memo të brendshme, të parë nga The New York Times.

OpenAI shihet gjerësisht si një kompani në kulmin e saj, me investime fitimprurëse që po derdhen, dhe ChatGPT – e cila u publikua pothuajse një vit më parë – përdoret nga miliona njerëz.