Putin viziton Mariupolin, zyrtari ukrainas e krahason me Hitlerin: Aty kuptoi edhe ai që kishte humbur

Presidenti rus Vladimir Putin ka vizituar gjatë fundjavës qytetin e Mariupolit, një qytet ukrainas në rajonin e Donetskut, i cili është pushtuar nga forcat e Moskës që nga maji i vitit të kaluar. Putin fluturoi për në Mariupol me helikopter dhe udhëtoi nëpër disa rrethe të qytetit, duke bërë ndalesa dhe duke biseduar me banorët. Putin ka premtuar se Moska do të ndërtojë më shumë lagje banimi në Mariupol, në Republikën e vetëshpallur Popullore të Donetskut. Gjatë vizitës së tij në qytetin lindor të Ukrainës, Putin foli me një banor vendas, i cili e përshkroi vendin si "një cep i vogël i parajsës", njoftoi agjencia e lajmeve Tass. Dhe presidenti rus tha: "Ne do ta zgjerojmë atë". Ky besohet të jetë udhëtimi i parë i Putin në Ukrainë, që prej pushtimit gati një vit më parë. Vizita vjen vetëm pak ditë pasi Gjykata Ndërkombëtare Penale lëshoi urdhër arresti ndërkombëtar për Putin, për krime lufte. Po ashtu, edhe një ditë pasi udhëheqësi rus udhëtoi në Krime për të shënuar përvjetorin e nëntë të aneksimit të gadishullit të Detit të Zi nga Ukraina. Mariupol për disa muaj ishte qendër e betejave të ashpra, por ra në duart e rusëve pas tërheqjes së batalionit “Azov”. Sakaq, reagimet nuk kanë munguar. Anton Gerashchenko, këshilltar i Ministrit të Brendshëm ukrainas, ka bërë një krahasim interesant në Twitter, mes Putinit dhe Hitlerit. “Edhe një diktator tjetër vizitoi Mariupolin. E dimë historinë e tij sesi ka përfunduar. Shumë historianë pohojnë se këtu Hitleri e kuptoi për herë të parë se lufta ishte humbur”, shkroi Gerashchenko. Nga ana tjetër, shumë ekspertë perëndimorë po e shohin vizitën e Putinit në Ukrainë si një spektakël të dështuar.