Raketa kundër asteroidëve për të shpëtuar Tokën, zbulimi i disa studentëve mahnit NASA-n

Duke vëzhguar Dimorphos nga observatori i shkollës, mësuesi dhe studentët vunë re se asteroidi “po sillej në mënyrë misterioze”. Pas përplasjes orbita e tij vazhdoi të ngushtohej. Fillimisht, shkencëtarët prisnin që objekti hapësinor të ngadalësohej dhe më pas të stabilizohej. Por, Jonathan Swift, një mësues i shkollës së mesme në shkollën Thacher në Kaliforni, SHBA, dhe studentët e tij vunë re se orbita e Dimorphos po bëhet gjithnjë e më e vogël. Jo vetëm kaq, pas përplasjes në shtator 2022, ajo po zvogëlohet me një minutë çdo muaj.

Mësuesi dhe studentët e tij i paraqitën rezultatet e vëzhgimeve të tyre Shoqatës Amerikane të Astronomisë në Nju Meksiko. Lajmi i mahniti shkencëtarët, të cilët nuk mund të mos merrnin parasysh vërtetësinë e informacionit të marrë nga shkolla. Tani disa studiues besojnë se orbita e Dimorphos mund të “shembet” dhe për këtë arsye ata po studiojnë asteroidin për të kuptuar se çfarë do të ndodhë me kalimin e kohës. Natyrisht, zbulimi do të ndikojë në misionet e ardhshme të NASA-s për të shpëtuar njerëzimin.

Kur anija kozmike u nis kundër Dimorphos në shtator 2022, ekipet e NASA-s u gëzuan, duke thënë se për herë të parë në histori ata kishin demonstruar se si njerëzit mund të mbroheshin nga një përplasje asteroidi. “Njerëzimi mund të shpëtohej nga kërcënimi që i dha fund mbretërimit të dinosaurëve”, kishin shkruar disa gazeta. Megjithatë, tani, përpara se të kryejnë një mision tjetër të këtij lloji, shkencëtarët do të duhet të kuptojnë se çfarë pasojash mund të shkaktojë “bombardimi” i një asteroidi.