Sekretari i Përgjithshëm i NATO ngre alarmin: Kina po kërcënon Evropën

Sekretari i Përgjithshëm i NATO-s, Jens Stoltenberg gjatë një vizite zyrtare në Japoni vuri theksin dhe një herë në kërcënimin e Kinës. “Kina paraqet sfida sigurie për interesat dhe vlerat e NATO-s, veçanërisht për shkak të marrëdhënieve të saj në rritje me Rusinë” u shpreh ai. Edhe intensifikimin e bashkëpunimit ushtarak i Pekinit me Moskën, e shqetëson zyrtarin e lartë të NATO-s. “Fakti që Rusia dhe Kina po forcojnë lidhjet dhe investimet e rëndësishme të Kinës në aftësitë e reja të avancuara ushtarake nënvizon kërcënimin dhe sfidat që ajo paraqet për aleatët e NATO-s. Pra, mesazhi është se siguria është një çështje globale dhe jo rajonale”, tha Stoltenberg. Por më pas ai theksoi se megjithëse ekzistojnë këto sfida Kina nuk është konsideruar asnjëherë si armike e NATO-s. "Ne nuk kërkojmë konfrontim me Kinën. Në fakt, ne s’duam konfrontim me askënd. NATO është një aleancë mbrojtëse. Ne do të vazhdojmë të angazhohemi me Kinën për çështjet ku shohim interes të përbashkët ose potencial për interes të përbashkët për kontrollin e armëve, ndryshimet klimatike dhe çështje të tjera", u shpreh ai. Ai kritikoi ashpër Kinën për "arrogancën ndaj fqinjëve të saj dhe kërcënimin ndaj Tajvanit". Sipas tij Kina po bëhet gjithnjë e më autoritare dhe po zhvillon armë që mund të godasin vendet anëtare të aleancës së NATO-s. Zoti Stoltenberg theksoi nevojën që Japonia dhe demokracitë e tjera të punojnë së bashku me aleancën e NATO-s për të mbrojtur rendin ndërkombëtar. Pas deklaratave të Stolenbergut ka reaguar Kina e cila i ka quajtur të ekzagjëruara pretendimet e këtij të fundit në lidhje me kërcënimin ushtarak nga Kina.