SHBA shton presionet në Lindjen e Mesme, Blinken thirrje Izraelit dhe Palestinës që të ndërmarrin hapat e nevojshëm për të ulur tensionet

Sekretari amerikan i Shtetit Antony Blinken vizitoi Lindjen e Mesme në një situatë të gjatë dhune dhe tensionesh të cilat shpërthyen para se ky i fundit të nisej për udhëtim. Sekretari amerikan, si fillim u takua me presidentin egjiptian Abdel Fattahal-Sisi dhe më pas ai kaloi në Izrael për tu takuar me kryeministrin izraelit Benjamin Netanyahu në Kudsin Perëndimor. Blinken, i bëri thirrje Izraelit dhe Palestinës që të ndërmarrin hapat e nevojshëm për të ulur tensionet në rritje në rajon. "SHBA-ja mbetet e përkushtuar ndaj vizionit të tyre për një zgjidhje me dy shtete në çështjen palestineze. Çdo hap që na largon nga ky vizion është i dëmshëm për sigurinë e Izraelit dhe qëllimin e tij afatgjatë për t'u bërë një demokraci hebreje", tha Blinken. Duke iu referuar tensioneve në rritje dhe humbjeve të jetëve në Izrael dhe Palestinë, sekretari amerikan tha: “U bëjmë thirrje të gjitha palëve të ndërmarrin hapat e nevojshëm për të siguruar qetësinë dhe uljen e tensionit”. Blinken, duke përdorur shprehjen "Harem Al-Sharif" (Xhamia e Shenjtë) për Mesxhidal-Aksanë, nënvizoi se janë të përkushtuar për të ruajtur status quo-në e objekteve fetare në Kuds. Përshkallëzimi në Bregun Perëndimor dhe fryma antidemokratike e qeverisë së re mund ta bëjnë të vështirë mbështetjen e Izraelit në organizatat ndërkombëtare si OKB-ja, Gjykata Ndërkombëtare Penale dhe Gjykata Ndërkombëtare e Drejtësisë në Hagë. Por jo vetëm kaq, përshkallëzimit me palestinezët i shtohet edhe çështja e reformës në drejtësi të dëshiruar nga ministri Yariv Levin i cili synon të kufizojë kompetencat dhe autonominë e gjyqësorit.