Tronditëse! Vritet me armë brenda makinës gazetarja investigative, zbardhen detaje

Gazetarja Lourdes Maldonado López u qëllua për vdekje të dielën në qytetin kufitar verior të Meksikës, Tijuana. Ajo është gazetarja e tretë që vritet në harkun kohor të dy javëve në Meksikë.

López u qëllua për vdekje brenda një makine në lagjen Santa Fe të Tijuana, sipas një deklarate të së dielës nga Zyra e Prokurorit të Përgjithshëm.

Autoritetet e sigurisë morën një raport për të shtëna, dhe më pas e gjetën López të vdekur pas mbërritjes në vendngjarje.

Një hetim është duke u zhvilluar.

López mbulonte korrupsionin dhe politikën dhe ky nuk ishte sulmi i parë ndaj saj.

Në mars 2019, López i tha Presidentit të Meksikës Andrés Manuel López Obrador në konferencën e tij të përditshme për shtyp se ajo kishte frikë për jetën e saj dhe kërkoi “mbështetjen, ndihmën dhe drejtësinë e punës”.

López po fliste për një mosmarrëveshje pune që kishte me Jaime Bonilla, i cili zotëron median PSN ku López kishte punuar më parë. López kishte paditur kompaninë për shkarkim të padrejtë nga puna. Bonilla u betua si guvernator i Baja California në nëntor 2019 pasi zhvilloi një fushatë të suksesshme si kandidat i partisë Morena në pushtet të López Obrador.

Vetëm disa ditë para se të vritej, ajo fitoi gjyqin për shkarkimin e padrejtë nga puna.

Në një intervistë për radiostacionin Radio Formula që Bonilla postoi në llogarinë e tij në Tëitter të hënën, ai tha se ndërsa nuk e kishte parë Lopez për shumë vite, ai kishte “gjithmonë” një “marrëdhënie të mirë” me të.

Bonilla tha se nuk e dinte pse Lopez i kishte kërkuar mbrojtje presidentit, duke thënë se “nuk ka pasur kurrë një kërcënim, madje as një debat me të”.

“Sa herë që u ndodh diçka gazetarëve, dhemb”, tha Bonilla, duke i shprehur gjithashtu ngushëllimet familjes së Lopez.

Komiteti për Mbrojtjen e Gazetarëve tha në një postim në Twitter se është “i tronditur” nga vrasja e López dhe u bëri thirrje autoriteteve që “të hetojnë në mënyrë të plotë dhe transparente sulmin”.