Vijojnë protestat kundër reformës së pensioneve

Me pjesëmarrje relativisht të kufizuar të punonjësve dhe incidente sporadike, raundi i 14-të i demonstratave dhe aksioneve të grevës kundër reformës së sistemit të pensioneve në Francë përfundoi të martën pasdite.

Sipas sindikatës së majtë CGT, numri i demonstruesve ishte pothuajse 900,000 në të gjithë vendin, ndërsa në Paris ishte rreth 300,000. Përkundrazi, sipas vlerësimeve të autoriteteve policore, demonstruesit në Paris ishin rreth 30.000.

Në margjinat e mobilizimit në Paris pati incidente të kufizuara që rezultuan me plagosjen e një punonjësi policie dhe arrestimin e 17 protestuesve, siç njoftoi policia.

Analistët politikë spekulojnë se sot ishte ndoshta raundi i fundit i mobilizimit të grevës për sistemin e ri të pensioneve, të cilin qeveria e vendit tashmë ka nisur ta zbatojë. Sistemi kishte kaluar edhe në Gjykatën Kushtetuese, e cila kishte dhënë një mendim pozitiv.

Përfaqësuesit e sindikatës theksojnë se opinioni publik francez është ende kundër reformës së pensioneve dhe vlerësojnë se do të ketë forma të reja reagimi social ndaj planeve të qeverisë.