Vladimir Putin paralajmëron vendosjen e armëve bërthamore në Bjellorusi

Presidenti rus Vladimir Putin ka arritur një marrëveshje me Bjellorusinë fqinje për të stacionuar armë bërthamore në territorin e saj, siç raporton agjencia ruse e lajmeve Tass, duke cituar një deklaratë të presidentit rus. “Një veprim i tillë nuk do të shkelte marrëveshjet për mospërhapjen e armëve bërthamore,” tha Putin, duke vënë në dukje se SHBA ka stacionuar armë bërthamore në territorin e aleatëve të saj evropianë. Presidenti i Bjellorusisë Alexander Lukashenko e ka përmendur prej kohësh çështjen e vendosjes së armëve bërthamore në vendin, i cili kufizohet me Poloninë, tha Putin, sipas Reuters. “Rusia do të përfundojë ndërtimin e një objekti të ruajtjes së armëve bërthamore në Bjellorusi deri më 1 korrik”, theksoi Putin. Në të njëjtën kohë, presidenti rus ka paralajmëruar se do të përdorë predha të uraniumit të varfëruar në Ukrainë nëse Kievi merr predha të këtij lloji nga Perëndimi. Nuk kanë munguar reagimet, as të Ukrainës, e as të SHBA-së. “Ne nuk kemi parë asnjë arsye për të ndryshuar pozicionin tonë strategjik bërthamor dhe as ndonjë indikacion që Rusia po përgatitet të përdorë një armë bërthamore”, tha zëdhënësi i Departamentit të Shtetit, Vedant Patel. Ai shtoi se Rusia dhe Bjellorusia kanë diskutuar edhe më parë për këtë lëvizje të armëve, pasi kanë bërë deklarata të shumta vitin e kaluar. Ndërsa Sekretari i Këshillit të Sigurisë Kombëtare dhe Mbrojtjes të Ukrainës, Oleksiy Danilov është shprehur se ky është një hap drejt destabilizimit të brendshëm të vendit. "Deklarata e Putinit maksimizon nivelin e perceptimit negativ dhe refuzimit publik të Rusisë dhe Putinit në shoqërinë bjelloruse. Kremlini e mori Bjellorusinë peng", shkroi ai në Twitter.