Braçe shton kritikat ndaj qeverisë dhe paralajmëron krizë: Nxirrini nga halli i burokracisë e paaftësisë bujqit

Deputeti socialist Erion Braçe vijon me denoncimet për braktisjen e bujqërve nga shteti në Shqipëri. Nëpërmjet një statusi në rrjetet sociale, ish-zv/kryeministri përmend rastin e dy fermerëve nga Çerma Andi Kaca dhe Aldi Dupi të cilët kërkojnë naftë për të vënë në punë pajisjet bujqësore për të korrur jonxhën dhe vaditur tokat. Ai shtoi se dy bujqit e rinj po klithin për ndihmë, ndërsa theksoi se thatësira po dëmton dhe misrin e mbjellë. “Është e hënë, ditë pune apo jo?! Bujqësia kërkon naftën dhe ujin për vaditje! Sot në mëngjes, Andi Kaca e Aldi Dupi, dy djem poshtë të 30-ave që merren me bujqësi në Çermë Sektor/Divjakë, janë në punë, në fushat e Tërbufit; të dy kishin një hall; naftën për mekanikën bujqësore! Po vonohen, klithin. Misri po dështon për mbirje. Ka 10 ditë i mbjellë, nga thatësira e nevoja jetike për ujë; na duhet nafta për pompat; erdhi vakti të korrim jonxhat e na duhet nafta për mekanikën; shkurt e qartë, kaq”, komentoi Braçe në rrjetet sociale. Më tej, ai ironizon të gjithë komentuesit që mendojnë se po sulmon ministren e Bujqësisë, Frida Krifcën për t’i zënë vendin. Në fund, deputeti Braçe u bën thirrje autoriteteve shtetërore që të bllokojnë furnizimin me naftë për bujqit duke mënjanuar procedurat burokratike dhe paaftësinë e zyrtarëve shtetërorë. Ai paralajmëron se nëse sektori bujqësor do vazhdojë të mbetet i braktisur nga shteti, çështja e furnizimit me ushqime në Shqipëri do të kthehet në problem madhor. “Është edhe ky rresht: na shih pak në Tërbuf për naftën se edhe 7 djem të rinj kanë mbetur që mbjellin toka! Kam që javën e parë të janarit që u flas e flas për naftën dhe ujin. Ju një daulle: gënjen Erioni se do t’i zërë vendin Fridës! 500 tonë naftë e shpërndarë është një gotë me ujë në fushat e Myzeqesë! Nxirrini nga halli i burokracisë e paaftësisë bujqit që halli i tyre mos kthehet shpejt halli i ushqimit të gjithë Shqipërisë!”, mbyll statusin e tij në Facebook, Erion Braçe.