Eksperti i ekonomisë: Qeveria të heqë dorë nga ligjet për amnisti fiskale e legalizim të kanabisit, fokusi të jetë prodhimi vendas

Situata ekonomike në vend, për ekspertin e ekonomisë Zef Preçi, është e favorshme për sipërmarrësit e mëdhenj dhe qeverinë, por jo për qytetarët. Sipas Preçit, i cili ka folur në një studio televizive ditën e djeshme, janë mekanizmat veprues të qeverisë që e kanë sjellë situatën në këtë pikë, ku çmimet janë të larta, paketat e ndihmës të pamjaftueshme, ndërsa diskutohen ligje për amnisti fiskale ose legalizim të kanabisit mjekësor, që për ekspertin favorizojnë pastrimin e parave të drogës.“Si kanabisi mjekësor si amnistia fiskale favorizojnë pastrimin e parave, ndërsa qeveria këmbëngul për ndryshimin e projektligjit pavarësisht reagimit të Komisionit Evropian që u shpreh kundër”, u shpreh Preçi. Ai tha se edhe rënia e ndjeshme e monedhës së euros, ku kursi i këmbimit është aktualisht 1 me 118,37 lekë, ka ardhur si pasojë e parave informale që qarkullojnë në vend. Eksperti i ekonomisë theksoi se forcimi i parasë përkundrejt euros nuk është në interes të qytetarëve, por të bankave dhe të qeverisë.“Një monedhë e fortë kombëtare nuk është tregues e shëndetit të ekonomisë por e zhbalancimit. Dëshmi e pakundërshtueshme e një oferte të rritur në tregun vendas. Shkak për rënien e euros është rritja e informalitetit. Qeveria dhe banka janë të lumtur, por bizneset nuk janë të favorizuara. Duhen monitoruar tregjet dhe kanalet përmes të cilave paratë informale hyjnë në ekonomi”, tha eksperti. Eksperti Preçi theksoi se shteti dhe bankat kanë rritur depozitat, por rritja e depozitave nuk është e shëndetshme nëse kapitali nuk absorbohet nga bizneset dhe qytetarët. Ai shprehu keqardhje për mënyrën se si qeveria menaxhoi të ardhurat shtesë nga rritja e çmimeve, ku subvencionoi ndërtuesit.“Nuk është shëndet pasurimi i depozitave, por thithja, absorbimi nga bizneset. Ndjej keqardhje për mënyrën e menaxhimit të të ardhurave suplementare të shkaktuara për rritjen e çmimet, pra, fakti që u shpërndanë te sipërmarrësit që iu cenua fitimi, jo ekzistenca”, tha ai.