Gjykata Kushtetuese rrëzon Shoqatën e Ndërtuesve, 3% e objekteve që do ndërtohen do t’i kalojnë shtetit për strehim social

Gjykata Kushtetuese ka vendosur të rrëzojë kërkesën e Shoqatës së ndërtuesve për taksën 3% për strehimin social. Në tetor të viti 2020, Këshilli Bashkiak i Tiranës miratoi vendimin “Për kontributin e sektorit privat në krijimin e fondit të banesave sociale që kalojnë në pronësitë Bashkisë Tiranë nga ndërtimet e reja”, i cili parashikon që çdo ndërtues që zhvillon një pronë në Tiranë duhet t’i japë 3% të sipërfaqes së ndërtuar bashkisë dhe kjo e fundit do i përdorë për strehim social. Por, ndërtuesit nuk e kanë pritur mirë këtë vendim, duke u shprehur se kjo është një barrë plus për ta. Prandaj, disa javë më parë ata e dërguan çështjen në Gjykatën Kushtetuese, duke kërkuar anulim për vendimin e bashkisë. Kushtetuesja ka zhvilluar tre seanca plenare për këtë çështje, ndërsa dy ditë më parë vendosi të rrëzojë kërkesën e bërë nga ndërtuesit. Në vendimin e publikua nga gjykata thuhet se, kërkesa e bërë nga Shoqata e Ndërtuesve nuk ka bazë legjitime dhe nga shqyrtimi i thelluar i çështjes u vendos që kërkesa të rrëzohet dhe neni që kërkon dhënien për strehim social 3% të objekteve që do ndërtohen të mbetet në fuqi. “Gjykata Kushtetuese e Republikës së Shqipërisë mori në shqyrtim në seancën plenare publike të zhvilluar në 28.04.2021 kërkesën nga Shoqata e Ndërtuesve të Shqipërisë, të cilik kërkonin që 22/2018 “Për strehimin social”. Në përfundim të shqyrtimit, Gjykata Kushtetuese konstatoi mungesën e legjitimimit në drejtim të përfaqësimit të kërkueses në Gjykatën Kushtetuese dhe për këtë arsye, vendosi: Rrëzimin e kërkesës së paraqitur nga Shoqata e Ndërtuesve në Tiranë. Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar”, theksohet në vendimin e publikuar nga Gjykata Kushtetuese.

Paralajmërimi i ndërtuesve

Ndërkohë që Kushtetuesja ishte në proces shqyrtimi të kërkesës së ndërtuesve, ata dolën në një paralajmërim të fortë. Përmes një deklarate publike, Shoqata e Ndërtuesve u shpreh se aplikimi i taksës për strehim social do të detyrojë ata të rrisin çmimin e shitjes së banesave. Sipas tyre, ky vendim është miratuar pa u konsultuar me ta dhe zbatimi i tij në muajt në vijim do të shkaktojë kosto shtesë për qytetarët. “Komuniteti i biznesit ndihet i shqetësuar në lidhje me një ligj të miratuar kohë më parë për barrën e taksave me të cilën është rënduar sektori i ndërtimit. Në mënyrë të njëanshme dhe arbitrare, Parlamenti ka votuar ligjin për Strehimin Social, i cilin detyron që 3 për qind të sipërfaqes së ndërtimit t’i kalohet bashkive për familjet e pastreha. Komuniteti i biznesit e konsideron këtë ligj si një taksë të paarsyeshme dhe kërkon rishikimin e saj. Ky ligj do të rrisë kostot për metër katror të çdo objekti të ri, pasi ai do të rëndojë në çmimin final që paguhet nga konsumatori. Si hap të parë, komuniteti i biznesit kërkon që ky detyrim shtesë të evidentohet si një zë më vete në kontratën finale të shit-blerjes, në mënyrë që të evidentohet që ky është një detyrim i politikës dhe jo një kosto e ndërtuesit”, thuhet në deklaratë. Ata shprehen se, një zgjedhje e mesme është që kjo taksë të shpërndahet edhe me pronarin e truallit dhe subjekte të tjerë që përfshihen dhe që janë taksapagues. “Solidariteti për shtresat në nevojë dhe vulnerable, duhet të mbështetet nga të gjithë tatimpaguesit e Shqipërisë dhe jo vetëm nga një segment i caktuar i ekonomisë, siç është sektori i ndërtimit, i cili sot është më i rënduari nga barra e taksave”, theksohet në deklaratën e Shoqatës së Ndërtuesve, në bashkëpunim me tre shoqata të tjera.